Փաշինյանը զիջել է տարածքներ, որոնք նոյեմբերի 9-ի հայտարարության մաս չէին կազմում, սակայն կարող էին այժմ դեմարկացիոն գործընթացում բանակցությունների առարկա դառնալ. Աննա Կարապետյան (տեսանյութ)

Գործող իշխանությունը զիջել է Ադրբեջանին տարածքներ, որոնք նոյեմբերի 9-ի հայտարարության, մաս չէին կազմում, սակայն կարող էին այժմ դեմարկացիոն գործընթացում բանակցությունների առարկա դառնալ: Այս մասին «Առավոտյան լուրեր Լիլիթ Թումանյանի հետ» հաղորդման «Հայացք. Երկրագունդ» խորագրի ներքո ասել է «Հայացք» վերլուծական կենտրոնի տնօրեն Աննա Կարապետյանը:

«Հայաստանը երկու նախապայման էր դնում դեմարկացիայի գործընթաց սկսելու համար: Արտգործնախարարը հայտարարում էր, որ քանի դեռ չունենք դիվանագիտական հարաբերություններ, չենք կարող խոսել դեմարկացիայի մասին: Փաշինանը փորձեց երեկ խմբագրել, որ քանի որ չունենք դիվանագիտական հարաբերություններ, բանակցությունները եռակողմ են լինելու: Երկրորդ պահանջն ադրբեջանական զորքի դուրսբերումն էր»,- հիշեցրել է նա:

Փորձագետն ընդգծել է, որ փաստացի մեր նախապայմանները չեն կատարվել, բայց մենք մտնում ենք դեմարկացիայի գործընթաց, իսկ Փաշինյանն էլ հայտարարում է, որ եթե ադրբեջանական զորքը մինչ այդ դուրս չգա, մենք կետ կունենանք, որ պարտավոր լինի դուրս գալ:

«Այսինքն, սկզբից դու նախապայմաններ ես առաջ քաշում, դրանք չեն կատարվում, և դու սկսում ես քո պահաջները տրանսֆորմացնել»,- ասել է Կարապետյանը:

Կարապետյանը նշել է՝ կարևոր է նաև, թե ինչ քարտեզների հիման վրա է իրականացվելու դելիմիտացիան: «Այժմ կարևորագույն պահանջ է հրապարակել այդ քարտեզները, որ հասկանանք, թե ինչ սկզբունքով են դրանք ընտրվել և ինչ սկզբունքով է իրականացվելու դելիմիտացիան»,- նշել է նա:

Աննա Կարապետյանն ընդգծել է, որ Ադրբեջանը ներկա պահին փորձում է դեմարկացիայի ներքո լուծել նաև հաղորդակցության և միջանցքների հարցերը:

«Եվ խնդիրն այն է, որ մենք չգիտենք, թե գործող իշխանությունն ինչ գաղտնի պայմանավորվածություններ ունի՝ բանավոր կամ գրավոր: Նոյեմբերից առ այսօր ականատես ենք եղել բազում օրինակների, երբ եղել են գաղտնի պայմանավորվածություններ և դրանցով, օրինակ, ՀՀ ճանապարհի նկատմամբ Ադրբեջանը վերահսկողություն է ստացել»,- ասել է նա և հավելել, որ հետագայում իշխանության ներկայացուցիչներն ստիպված են եղել ընդունել այդ փակ պայմանավորվածությունների առկայության փաստը:

«Եվս մեկ կարևոր հանգամանք՝ գործող իշխանությունը զիջել է Ադրբեջանին տարածքներ, որոնք մաս չէին կազմում նոյեմբերի 9-ի հայտարարության, սակայն կարող էին այժմ դեմարկացիոն գործընթացում բանակցությունների առարկա դառնալ»,- ասել է քաղաքագետը:

Նա նշել է, որ Հայաստանի և Ադրբեջանի միջև պետք է լինի դեմարկացիա, սակայն դա պետք է իրականացվի նորմալ իշխանության օրոք, որը կպաշտպանի մեր ազգային, պետական շահերը, ոչ թե կսպասարկի Ադրբեջանի շահերը, ունակ կլինի բանակցություն վարել, ոչ թե Ադրբեջանի բոլոր ցանկություններին համապատասխան գաղտնի պայմանավորվածություններ ձեռք կբերի և կկարողանա Արցախյան հիմնահարցն ու այս խնդիրը դիտարկել առանձին:

Մանրամասները տեսանյութում: