Եթե բանակցությունների արդյունքում Ադրբեջանը չզիջի, ՀՀ-ն լեգիտիմ իրավունք ունի ուժ կիրառել․ խնդրի չկարգավորվելու դեպքում կլինի ռազմական նոր կոնֆլիկտ ՀՀ տարածքում․ Էդմոն Մարուքյանի ասուլիսը (տեսանյութ)

Պատերազմից հետո մենք ունենք շուրջ 540 կմ նոր սահման, որը, ըստ էության, ոչ բոլոր տեղերում է կահավորված, և ոչ բոլոր տեղերում, բնականաբար, կան զորքեր կամ սահմանապահ զորքեր։ Այս մասին այսօր կայացած մամուլի ասուլիսին հայտարարեց ԱԺ «Լուսավոր Հայաստան» խմբակցության ղեկավար Էդմոն Մարուքյանը՝ անդրադառնալով Սյունիքում տիրող իրավիճակին։

«Ես կարծում եմ՝ եթե բանակցությունների արդյունքում ադրբեջանական կողմը չզիջի, հայկական կողմը լեգիտիմ իրավունք ունի կիրառել իր ձեռքի տակ եղած բոլոր գործիքները, այդ թվում՝ ուժ կիրառել, սակայն այս պահին կիրառվող միջոցները ճիշտ են, պետք է բոլոր միջոցները սպառել, հետո միայն ուժի կիրառումը։ Հույս կա, որ բանակցությունների արդյունքում ադրբեջանական կողմը հետ կքաշվի»,-նշեց Մարուքյանը։

Նա ճիշտ քայլ համարեց ՀՀ-ի կողմից ՀԱՊԿ-ին դիմելը․ «Անդամ պետության սահմանում հասունանում է նոր էսկալյացիա։ Ադրբեջանը որևէ կերպ չի հանդարտվելու, եթե տեսնի, որ այս դեպքը հանդուրժում ենք թե՛ մենք, թե՛ ՀԱՊԿ-ը։ Ուսումնասիրելով ՀԱՊԿ-ին ուղղված փստաթուղթը՝ եկել եմ այն եզրահանգման, որ հայկական կողմը չի ցանկացել իր ունեցած բոլոր «փամփուշտները» կրակել, կրակել է դեռևս 2-րդ հոդվածի «փամփուշտը», ինչը նշանակում է՝ մենք միանգամից ՀԱՊԿ-ից զորք չենք ուզում։ Եթե խնդիրը չկարգավորվի, կլինի ռազմական նոր կոնֆլիկտ ՀՀ տարածքում, ՀԱՊԿ տարածքում»,-նշեց նա՝ հավելելով, թե բազմաթիվ տեղերում Ադրբեջանը զորք չունի, մենք էլ կարող ենք նույն բանն անել, ինչը նա արել է Սյունիքում։

Մարուքյանն ընդգծեց՝ նոյեմբերի 9-ի փաստաթղթով զորքերը պետք է կանգնած մնային իրենց տեղերում, մինչդեռ ադրբեջանական զորքերը դրանից հետո անդադար շարժվում են դեպի ՀՀ-ին մոտ տարածքներ, բուֆերային գոտիներ․ «Այս իմաստով էլ նոյեմբերի 9-ի փաստաթուղթն անդադար ոտնահարվում է Ադրբեջանի կողմից, և սա նույնպես ազդանշան է թե՛ ՀՀ-ին, թե՛ ՌԴ-ին, որ Ադրբեջանը որևէ կերպ իրեն չի պահում որպես այդ փաստաթղթի կողմ»,-ասաց Մարուքյանը։

Ինչ վերաբերում է ռազմական դրություն հայտարարելու անհրաժեշտության վերաբերյալ հարցին, Մարուքյանն ասաց՝ քանի դեռ խաղաղ պրոցես է ընթանում և հնարավոր է խաղաղ հանգուցալուծում, ճիշտ չէ ռազմական դրություն հայտարարել։

«Ցանկացած սցենար կարող է լինել․ կարող են հիմա բոլորը հետ քաշվել, և ամեն ինչ ավարտվի, կարող են հետ չքաշվել, և դա վերածվի էսկալյացիայի և նոր կոնֆլիկտի։ Մի բան ակնհայտ է՝ պետք է բոլոր հնարավորություններն օգտագործել, որ ճգնաժամը խաղաղ հանգուցալուծվի»,-ասաց նա։

ԼՀԿ ղեկավարն ընդգծեց՝ այժմյան ՀՀ-ն 2020-ի սեպտեմբերի 27-ից առաջ եղած ՀՀ-ն չէ, հետպատերազմյան ՀՀ է։ «Հնարավոր է՝ մինչև սեպտեմբերի 27-ի ՀՀ-ն լիներ, այդ 250 հոգին չհասցնեին տեղ հասնել, խփվեին։ Նոր իրողություններ են, նոր իրավիճակ է, ինձ համար լավագույն լուծումը կլիներ այդ 250 հոգուն գերեվարելն ու եղած գերիների հետ փոխանակելը»,-նշեց նա։