«Իսրայելն իրավունք ունի պաշտպանել իրեն»․ Ջո Բայդենը՝ իսրայելա-պաղեստինյան բախումների մասին

ԱՄՆ-ի նախագահ Ջո Բայդենն իսրայելա-պաղեստինյան հակամարտության սրման ֆոնին հայտարարել է, որ Իսրայելն «իրավունք ունի պաշտպանել իրեն, երբ իր տարածքում հազարավոր հրթիռներ են թռչում», հաղորդում է Axios-ը։

Լրագրողի հարցին, թե արդյոք «մտահոգված է Մերձավոր Արևելքում շարունակվող բռնությամբ» և արդյոք խոսել է տարածաշրջանի պաշտոնյաների հետ, Բայդենը հայտնել է, որ խոսել է Իսրայելի վարչապետ Բենյամին Նեթանյահու հետ և «հույս ունի՝ բախումները վաղ թե ուշ կդադարեն»։

«Ես ակնկալում եմ և հուսով եմ՝ բախումները վախ թե ուշ կդադարեն, բայց Իսրայելն իրավունք ունի պաշտպանել իրեն, երբ իր տարածքում հազարավոր հրթիռներ են թռչում»,- ասել է Բայդենը՝ հավելելով, որ Ազգային անվտանգության և պաշտպանության գծով աշխատակիցները «մշտական կապի մեջ են Իսրայելի և տարածաշրջանի մյուս երկրների հետ»։

Նշենք նաև, որ Սպիտակ տան ավելի վաղ հրապարակած հաղորդագրության մեջ նշվում է, որ Նեթանյահուի հետ զրույցի ընթացքում Բայդենն «իր անսասան աջակցությունն է փոխանցել Իսրայելի անվտանգությանը, ինչպես նաև իրեն և իր ժողովրդին պաշտպանելու Իսրայելի օրինական իրավունքին»։

«Նա դատապարտել է ՀԱՄԱՍ-ի և այլ ահաբեկչական խմբավորումների հրթիռային հարվածները, այդ թվում՝ Երուսաղեմի և Թել Ավիվի ուղղությամբ։ Նա փոխանցել է իր այն համոզմունքը, որ Երուսաղեմը, որն ամբողջ աշխարհի հավատացյալների համար կարևոր նշանակություն ունի, պետք է խաղաղության վայր լինի»,- ասված է Սպիտակ տան հաղորդագրության մեջ։

Երուսաղեմում հուզումները սկսվել են մայիսի 7-ին: Արաբ երիտասարդների և ոստիկանության միջև բախումները բռնկվել են մայիսի 8-ի երեկոյան, այնուհետև շարունակվել՝ տարածվելով Տաճարի լեռան և Ալ-Աքսա մզկիթի տարածքում: Դրանք իրենց գագաթնակետին հասել են մայիսի 10-ին, երբ հրեաները նշում են Երուսաղեմի օրը: Բախումների սկզբից ի վեր Գազայի հատվածից ավելի քան 1000 հրթիռ է արձակվել Իսրայելի ուղղությամբ: 850 հրթիռ հատել է Իսրայելի սահմանը, ևս 200-ը ընկել՝ Գազայի հատվածում: Բախումների ընթացքում կան զոհեր և վիրավորներ, այդ թվում՝ խաղաղ բնակչության շրջանում: Իսրայելի բանակը հայտարարել Է, որ ոչնչացրել Է ՀԱՄԱՍ-ի հետախուզության հանգուցային դեմքերի, այդ թվում՝ ՀԱՄԱՍ-ի ռազմական հետախուզության անվտանգության բաժնի ղեկավարին ու նրա տեղակալին: