Լավրովի այցը տարածաշրջան ցույց տվեց՝ մեր պարտությունը շարունակվում է. փորձագետ
Գործընթացը ցույց է տալիս, որ Բաքուն այս ամենից ստանում է այն, ինչ ուզում է, իսկ մեզ որպես զիջում մատուցում են հումանիտար բնույթի հարցերը, որոնք ոչ թե բարի կամքի դրսևորում, այլ ուղղակի ստանձնած պարտավորություն են Ադրբեջանի կողմից: Այս մասին tert.am-ի հետ զրույցում նշել է «Հայացք» վերլուծական կենտրոնի փորձագետ Հերմինե Մխիթարյանը՝ անդրադառնալով ՌԴ ԱԳՆ-ի՝ տարածաշրջան կատարած այցին ու արդյունքներին:
«Ադրբեջանի նախագահը Լավրովի այցին ընդառաջ մեկնեց Նախիջևան և այնտեղից նաև հարցազրույցով հանդես եկավ, որի նպատակը, ըստ էության, միջնորդ կողմին սեփական օրակարգը թելադրելն էր: Ալիևը հերթական անգամ ընդգծեց իրենց մոտեցումը, որ կոնֆլիկտը լուծված է, որ նոյեմբերի 9-ի փաստաթուղթը ոչ թե հրադադարի հայտարարություն էր, այլ կարգավորման համաձայնագիր, և որ Արցախի կարգավիճակի մասին խոսք լինել չի կարող: Հիշեցնեմ՝ սա Լավրովի այցին ընդառաջ էր և հատկապես կարևոր էր այս ամենին ռուսական կողմի արձագանքը», - նշել է փորձագետը:
Մխիթարյանի դիտարկմամբ՝ Լավրովը չանդրադարձավ Ալիևի հայտարարություններին, փոխարենը՝ Բաքվում նորից կրկնեց այն, ինչ ներկայացրել էր Երևանում. «ՌԴ ԱԳՆ-ն նորից բարձրաձայնեց կոմունիկացիաները բացելու և հումանիտար բնույթի խնդիրները լուծելու անհրաժեշտության մասին՝ թողնելով մի կողմ քաղաքական հարցերը: Նորից խոսվեց փոխվարչապետների եռակողմ ձևաչափի մասին, ընդ որում՝ արձանագրելով առաջընթաց ու արդյունավետություն»:
«Առնվազն տարօրինակ է, որ Բաքվից ու Մոսկվայից դրական գնահատականներ են հնչում փոխվարչապետների ձևաչափով աշխատանքային խմբի գործունեության վերաբերյալ, իսկ Հայաստանի իշխանությունները պնդում են, որ որևէ պայմանավորվածություն դեռ չկա: Սա ստեղծում է տպավորություն, որ մեզ նորից փորձում են շեղել իրականությունից և նորից կանգնելու ենք արդեն կատարված փաստի առաջ», - նշեց Մխիթարյանը:
«Գործընթացը ցույց է տալիս, որ Բաքուն այս ամենից ստանում է այն, ինչ ուզում է, այս դեպքում՝ կոմունիկացիաների բացում և Սյունիքի միջանցք, իսկ մեզ որպես զիջում մատուցում են գերիների հարցը: Սա լրջագույն մարտահրավեր է, և, ըստ էության, հերթական ամրագրումը, որ մեր պարտությունը դեռ շարունակվում է: Ասվածի վկայությունն են նաև այսօր Սյունիքում ադրբեջանական սադրանքները և առաջխաղացումները», - ամփոփեց Մխիթարյանը: