Արգենտինայում համավարակի ժամանակ պաշտոնյան հրավիրել է 400 հյուր իր դստեր 15-ամյակին նվիրված տոնախմբության առթիվ
Արգենտինայի Տուկուման նահանգից պաշտոնյան կազմակերպել է իր դստեր 15-ամյակի տոնախմբությունն ու հրավիրել 400 մարդ համավարակի ընթացքում, հայտնել է նահանգի պատգամավոր Խոսե Կանոն, հաղորդում է ՌԻԱ Նովոստի-ն:
15-ամյակը տոնելը Լատինական Ամերիկայի երկրներում աղջիկների կյանքի ամենակարեւոր իրադարձությունն է: Այդտեղ համարվում է, որ հենց այդ տարիքում է սկսվում հասուն կյանքը: Ծննդյան տոնը նշվում է սովորաբար մեծ շուքով, տասնյակ, հարյուրավոր եւ անգամ հազարավոր հյուրերի մասնակցությամբ. ամեն ինչ կախված է ընտանիքի հնարավորություններից: Այդ օրվան պատրաստվում են մի քանի ամիս: Համավարակի ժամանակ այդ ծավալով տոնախմբությունից շատերը ստիպված էին հրաժարվել սահմանափակումների պատճառով:
«Նահանգի Ալդերետես քաղաքի վարչական մարմնի խորհրդական Լուիս Կորեան այս հանգստյան օրերին տոնել է իր դստեր 15-ամյակը՝ հրավիրելով 400 հյուր, որոնց շրջանում եղել են նահանգի կառավարությունից տարբեր պաշտոնյաներ»,-գրել է պատգամավորը թվիթերյան էջում եւ պահանջել խորհրդականի հրաժարականը:
Այդ տեղեկատվությունը հաստատել է նաեւ նահանգի կառավարությունը: Ներկայում գործը փոխանցվել է դատախազություն:
Տոնակատարությունը կազմակերպվել էր բաց տարածքում, սակայն Տուկումանում գործող սահմանափակումների համաձայն՝ արգելված է հավաքվել անգամ բաց տարածքներում ավելի քան 20 հոգով: