Times. Լոնդոնը հսկայական ներդրումներով մտադիր է կանխել Շոտլանդիայի անկախությունը
Բորիս Ջոնսոնի կառավարությունը պատրաստվում է բազմամիլիարդանոց միջոցներ ուղղել Շոտլանդիայում խոշոր ենթակառուցվածքային նախագծերին աջակցությանը՝ Մեծ Բրիտանիայից տարածաշրջանի առանձնացումը կանխելու համար, հաղորդում է The Times-ը՝ վկայակոչելով աղբյուրները, փոխանցում է ՏԱՍՍ-ը:
Նշվում է, որ բրիտանական իշխանությունները ներկայումս քննարկում են Շոտլանդիայում տրանսպորտային ու Ազգային առողջապահական ծառայության նախագծերում ներդրումներ կատարելու հնարավորությունը: Ընդ որում, Ջոնսոնի կաբինետը, ըստ հրապարակման, մտադիր է բյուջեից միջոցներն ուղղել Շոտլանդիայի կոնկրետ քաղաքապետարաններին՝ շրջանցելով տեղական կառավարությունը: Բացի այդ, բիզնեսի աջակցության միջոցառումների շրջանակներում Լոնդոնը կարող է Աբերդինի եւ Ինվերնեսի նավահանգիստներին հատուկ կարգավիճակ շնորհել, ինչը արտոնյալ հարկային պայմաններ է ենթադրում:
Թերթը շեշտել է, որ այդպիսով Միացյալ Թագավորության կառավարությունը ցանկանում է «ոչ թե խոսքով, այլ գործով» ցույց տալ Շոտլանդիայի բնակիչներին մեկ նահանգում համակեցության առավելությունները: Բրիտանական իշխող շրջանակներում, ըստ The Times-ի, հստակ համոզմունք կա, որ նման մոտեցումը կարող է կանխել Շոտլանդիայի անկախության երկրորդ հանրաքվեի անցկացումը: Պարբերականը նաեւ նշել է, որ շոտլանդական ենթակառուցվածքային նախագծերում ներդրումները, ամենայն հավանականությամբ, կքննարկվեն Շոտլանդիայի, Ուելսի եւ Հյուսիսային Իռլանդիայի ղեկավարների հետ Ջոնսոնի հանդիպման ժամանակ, որի անցկացման գաղափարի մասին Մեծ Բրիտանիայի վարչապետը հայտնել էր շաբաթ երեկոյան:
Մեծ Բրիտանիան իր ներկայիս վարչատարածքային կազմով պահելու հարցը կրկին սրվել էր մայիսի 6-ին Շոտլանդիայում կայացած տարածաշրջանային ընտրություններից հետո: 129 տեղանոց օրենսդիր մարմնում 64 տեղ ունեցող Շոտլանդական ազգային կուսակցությունը (ՇԱԿ) կրկին հաղթել էր տեղական խորհրդարանում (Հոլիրուդ):
Հաշվի առնելով «կանաչների» հաջողությունն ընտրություններին, որոնք խորհրդարան անցկացրին իրենց ութ ներկայացուցիչներին եւ սատարում են նաեւ տարածաշրջանի՝ Մեծ Բրիտանիայից անջատմանը, անջատողականության աջակիցները կզբաղեցնեն Հոլիրուդում տեղերի մեծամասնությունը եւ կարող են համատեղ առաջ տանել անկախության երկրորդ հանրաքվեի գաղափարը, որն ընդգրկված էր ՇԱԿ-ի նախընտրական ծրագրում:
Շաբաթ օրը Շոտլանդիայի առաջին նախարար եւ ՇԱԿ-ի առաջնորդ Նիկոլա Սթերջենը, մեկնաբանելով քվեարկության արդյունքները, հայտարարել էր, որ շոտլանդացի ժողովուրդը իրավունք ունի ինքնուրույն որոշել իր ապագան, եւ կոչ էր արել Լոնդոնին չխանգարել: Ջոնսոնը, ի պատասխան շոտլանդացի ազգայնականների պնդումներին, պարբերաբար դեմ էր արտահայտվում երկրորդ պլեբիսցիտի անցկացմանը մոտ ապագայում: