ԱՄՆ-ն կարող է Աֆղանստանից զորքերը տեղափոխել ՌԴ սահմաններին ավելի մոտ. The Wall Street Journal

ԱՄՆ-ն կարող է Աֆղանստանից դուրս բերված զորքերը տեղափոխել Կենտրոնական Ասիայի երկրներ, հայտնում է The Wall Street Journal-ը՝ վկայակոչելով սեփական աղբյուրների խոսքերը:

Պարբերականը նշում է, որ Վաշինգտոնին հենակետերն անհրաժեշտ են ոչ միայն ռազմական անձնակազմին, այլև անօդաչու թռչող սարքերի, ռմբակոծիչների և հրետանու տեղավորման համար՝ Քաբուլին աջակցություն տրամադրելու և «Թալիբան» արմատական շարժման զինյալներին զսպելու համար: ԱՄՆ կառավարության և Պենտագոնի ներկայացուցիչների խոսքով՝ Կենտրոնական Ասիայի հարևան երկրները, Պարսից ծոցի պետությունները և ռազմածովային առանձին նավեր զորքերի ապագա տեղակայման հնարավոր վայրեր կարող են լինել:

Ըստ որոշ ռազմական գործիչների և ԱՄՆ նախագահ Ջո Բայդենի վարչակազմի ներկայացուցիչների, լավագույն տարբերակը կլինի զորքերը տեղակայել Աֆղանստանին սահմանակից Ուզբեկստանում և Տաջիկստանում: Այսպիսով, անհրաժեշտության դեպքում, զինվորականները կարող են արագ մուտք գործել երկիր: Սակայն աղբյուրները շեշտում են, որ զորքեր տեղափոխելն այս երկրներ դժվար կլինի տարածաշրջանում Ռուսաստանի «մեծ ռազմական ներկայության» և Չինաստանի աճող ազդեցության պատճառով:

Աֆղանստանում ԱՄՆ հատուկ ներկայացուցիչ Զալմայ Խալիլզադը մայիսին այցելել է Ուզբեկստան և Տաջիկստան, որտեղ քննարկել է իրավիճակը նրանց հարևան երկրում: Ըստ թերթի աղբյուրների՝ Տաշքենդն ու Դուշանբեն իրենց դժկամությունն են հայտնել բռնություն տարածելու հարցում և անհանգստություն են հայտնել իրավիճակի կապակցությամբ:

Անանուն պաշտոնյաները թերթին հայտնել են նաև, որ Կենտրոնական Ասիայում որևէ ռազմաբազայում զորք տեղակայելու առնչությանբ քննարկումներ դեռ չեն եղել, և ԱՄՆ պաշտպանության նախարարությունն այժմ կշռադատում է դրական և բացասական կողմերը: Որոշումը կայացնելուն մասնակցում են նաև Պետդեպարտամենտը և Սպիտակ տունը:

Ինչպես նշում է թերթը, ԱՄՆ-ն նախկինում ունեցել է երկու հենակետ Կենտրոնական Ասիայում՝ Ուզբեկստանում և Ղրղզստանում: Երկուսն էլ օգտագործվել են Աֆղանստանում ուժեր տեղակայելու և գործողություններ կատարելու համար: 2005-ին ԱՄՆ-ն լքել է Ուզբեկստանում իր հենակետը, ապա գրեթե 10 տարի անց՝ դուրս է եկել նաև Ղրղզստանից:

Չնայած Վաշինգտոնի և Մոսկվայի և Պեկինի հարաբերությունների վատթարացմանը՝ պետությունները, ըստ ԱՄՆ-ի և մի շարք այլ երկրների պաշտոնյաների, կիսում են Միացյալ Նահանգների շահը տարածաշրջանում կայունություն հաստատելու հարցում: Կենտրոնական Ասիան, իր հերթին, ցանկանում է հակակշիռ ստեղծել Ռուսաստանի ու Չինաստանի ազդեցության համար, գրում է թերթը:

Պարբերականի տվյալներով՝ ամերիկյան զորքերի դուրսբերումը կարող է ավարտվել հուլիսին:

Հիշեցնենք՝ ավելի վաղ ԱՄՆ վարչակազմը հայտարարել էր, որ մինչ մայիսի 1-ից մինչև սեպտեմբերի 11-ը կավարտի Աֆղանստանից զորքերի դուրսբերումը դաշնակիցների հետ լիարժեք համաձայնեցմամբ: 2020 թվականին ԱՄՆ-ն և «Թալիբան» արմատական շարժման ներկայացուցիչները Դոհայում ստորագրել էին ավելի քան 18 տարվա պատերազմի ավարտն ազդարարող առաջին համաձայնագիրը: Այն նախատեսում է 14 ամսվա ընթացքում Միջին Արևելքի պետությունից օտարերկրյա զորքերի դուրսբերում և գերիների փոխանակումից հետո միջաֆղանական երկխոսության սկիզբ:

Համաձայնագրի ստորագրումից ի վեր «Թալիբան»-ը բազմիցս մեղադրել է Վաշինգտոնին համաձայնագիրը խախտելու համար: