«Իսրայելը երկիր չէ, այլ ահաբեկչական հենակետ, որը գործում է Պաղեստինի ժողովրդի և մուսուլման այլ ազգերի դեմ». Այաթոլլահ Ալի Խամենեի

Իսրայելը պետք է համարվի ոչ թե պետություն, այլ ահաբեկչական հենակետ:

Այս մասին հայտարարել է Իրանի գերագույն առաջնորդ Այաթոլլահ Ալի Խամենեին, գրում է interfax.ru-ն:

«Իսրայելը երկիր չէ, այլ ահաբեկչական հենակետ, որը գործում է Պաղեստինի ժողովրդի և մուսուլման այլ ազգերի դեմ», - ասել է Խամենեին հեռուստատեսային ուղերձում և հավելել՝ ինքը համարում է, որ «բոլորի պարտքն է պայքարել այս բռնապետական ռեժիմի դեմ»:

Նշենք՝ Խամենեին ուղերձով է հանդես եկել Իրանի Իսլամական հեղափոխության պահապանների կորպուսի «Ղոդս» հատուկ ստորաբաժնման անդամ պաղեստինցիների հետ համերաշխության օրվա կապակցությամբ:

Վերջերս Իրանի և Իսրայելի դիմակայությունը կրկին սրվել է: Այաթոլլահ Խամենեիի հիմնարար փիլիսոփայական ուսմունքների հիման վրա Իրանը սկսել է քարոզչական պայքար մղել Իսրայելի դեմ: Դրան զուգահեռ, Իրանը ակտիվացրել է իր գործունեությունը Մերձավոր Արևելքում, մասնավորապես Սիրիայում, և նաև սկսել է ավելի ինտենսիվ աշխատանք տանել իր միջուկային ծրագրի ուղղությամբ: Իսրայելը, ի պատասխան, նույնպես ակտիվորեն վարում է հակաիրանական քաղաքականություն:

Հիշեցնենք՝ ապրիլի 11-ին Իրանի «Նաթանզ» ստորգետնյա միջուկային օբյեկտի էլեկտրաէներգիայի բաշխման համակարգում միջադեպ է տեղի ունեցել: Իրանի ատոմային էներգիայի կազմակերպության ղեկավար Ալի Աքբար Սալեհին ասել է, որ համակարգում խափանումը «միջուկային ահաբեկչության» դրսևորում է: Այնուամենայնիվ, նա զերծ է մնացել որևէ ուժերին սաբոտաժի համար մեղադրելուց:

Ավելի վաղ Jerusalem Post-ը հաղորդել էր, որ դա հաքերային հարձակում է, որի հետևում, հավանաբար, կանգնած է Իսրայելի հետախուզության և հատուկ առաջադրանքների վարչությունը՝ «Մոսադ»-ը:

Նկատենք՝ դեպքից մեկ օր առաջ Իրանը հայտարարել էր այս միջուկային կայանում առաջադեմ ցենտրիֆուգների գործարկման մասին, որի շնորհիվ հնարավոր կլինի ակտիվացնել ուրանի հարստացման գործընթացը: