Ռուսաստանը հանձնառու է իր դաշնակից Հայաստանի անվտանգության ապահովմանը. Լավրով

Ռուսաստանը հանձնառու է իր դաշնակցի՝ Հայաստանի անվտանգության ապահովմանը: Այս մասին հայտարարել է ՌԴ ԱԳ նախարար Սերգեյ Լավրովը Նիկոլ Փաշինյանի հետ հանդիպման ժամանակ:

«Հանձնառու ենք մեր դաշնակից Հայաստանի Հանրապետության անվտանգության ապահովմանը: Այս մասին խոսվել է նաև ՌԴ նախագահ Վլադիմիր Պուտինի հետ Ձեր շփումների, ինչպես նաև մեր պաշտպանական գերատեսչությունների միջև տեղի ունեցող ինտենսիվ շփումների ժամանակ: Այստեղ ոչ մի կասկած լինել չի կարող»,- ասվում է ՌԴ ԱԳՆ հաղորդագրության մեջ:

Ռուս նախարարի խոսքով՝ ՌԴ-ի և Հայաստանի համագործակցությունը հետևողականորեն իրագործվում է բոլոր ուղղություններով՝ ներառյալ տնտեսությունը, քաղաքական կապերը, ռազմական և ռազմատեխնիկական համագործակցությունը:

«Գնահատում ենք Լեռնային Ղարաբաղի հակամարտության կարգավորման հարցով պայմանավորվածությունների ձեռքբերումը: Երախտապարտ ենք, որ Դուք ընդգծում եք Ռուսաստանի և անձամբ նախագահ Պուտինի դերն այն ջանքերում, որոնք թույլ են տվել դադարեցնել ռազմական գործողությունները: Ակտիվորեն աջակցում ենք եռակողմ աշխատանքային խմբի աշխատանքին՝ Ռուսաստանի, Հայաստանի և Ադրբեջանի փոխվարչապետների մակարդակով, որոնք զբաղվում են ներկա փուլում ամենանշանակալի հարցով, որն է տնտեսական, տրանսպորտային հաղորդակցությունների ապաշրջափակումը, ինչը թույլ կտա գործնականում դադարեցնել Հայաստանի ապաշրջափակումը և փոխշահավետ փոխգործակցություն ապահովել տարածաշրջանի բոլոր երկրների համար»,- նշել է Լավրովը՝ ընդգծելով, որ ռուսական խաղաղապահ զորակազմը կշարունակի իրականացնել իր առաջադրանքը Լեռնային Ղարաբաղում:

«Մեր խաղաղապահները կանեն ամեն ինչ, որպեսզի կարգավորեն շփման գծի հստակ որոշման հետ կապված հարցերը»,- հավելել է դիվանագետը: