«Լևոն Տեր-Պետրոսյանը նախանձում է Փաշինյանին, նա հիպնոս է անում, ես տակտիկա էի որդեգրել, հենց ելույթ էր ունենում, ընդմիջում էի խնդրում, որ ցվրվեի». Հովիկ Աղազարյան

Լևոն Տեր-Պետրոսյանն ինձ երբեք չի զարմացրել, որովհետև ես նրան շատ վաղուց եմ ճանաչում, բայց պետք է ասեմ, որ սա ինձ համար անակնկալ էր: Այս մասին այսօր ԱԺ-ում լրագրողների հետ զրույցում ասաց «Իմ քայլը» խմբակցության պատգամավոր Հովիկ Աղազարյանը՝ խոսելով ՀՀ առաջին նախագահ Լևոն Տեր-Պետրոսյանի՝ երկրորդ և երրորդ նախագահի հետ միանալու առաջարկի մասին:

Աղազարյանը նշեց, որ հնարավոր է սկզբունքներին դեմ գնալ, բայց խաչ քաշել այն իրողության վրա, որն ապրել է տարօրինակ է՝ նկատի ունենալով Մարտի 1-ի դեպքերը և դրա վերաբերյալ Լևոն Տեր-Պետրոսյանի հնչեցրած դիրքորոշումները:

«Սրա բացատրությունը Տեր-Պետրոսյանի ինքնասիրահարվածության աստիճանն է, ինքն այն ժամանակ էլ իրենից բացի ոչ մեկին չէր նկատում: Հիմա նա այսպիսի քայլեր է անում, որպեսզի ոչնչացնի նրանց, ովքեր 2008 թվականին իր հետ կանգնած էին, այսօր իրենից շատ բաներ սովորելով՝ Հայաստանում իրավիճակ փոխեցին, ինքն ուզում է այդ մարդկանց ոչնչացնել, որովհետև նախանձում է այդ մարդկանց: Ուզում է բախում առաջացնել այդ ուժերի մեջ, որպեսզի ինքը նորից մնա ամենա-ամենան: Ինքը չի կարող հանդուրժել այն, որ Նիկոլ Փաշինյանն ու իր երիտասարդ թիմն այս իրավիճակից կարող է դուրս գալ պատվով ու հունիսի 20-ին ներկայանալ ժողովրդի դատին, ունենալ այնպիսի արդյունք, որը իր համար սարսափելի կլինի: Ինքը բոլորին է նախանձում՝ խելոք լինելով հանդերձ»:

Աղազարյանի խոսքով՝ այս ամենով հանդերձ Լևոն Տեր-Պետրոսյանը կարողանում է մարդկանց իր կողքին պահել, սակայն այսօր 1990-ականների դեմքերից ոչ մեկը չի մնացել նրա կողքին: «Երբ որ ես պատգամավոր էի 90-ականներին, երբ Գերագույն խորհրդում կարևորագույն հարց էր քննարկվում, անպայման վերջում ինքն էր ելույթ ունենում, նոր դրվում էր քվեարկության: Ես մոտ 7-8 ամիս հետո հասկացա, որ ինքը հիպնոս է անում, հիպնոսի հատկություն ունի: Եվ ես արդեն տակտիկա էի որդեգրել, հենց ինքը ելույթ էր ունենում, որ պիտի գնայինք քվեարկության, ընդմիջում էի խնդրում, որ ցվրվեի»:

Դիտարկմանը, թե մարտի վերջին երեք նախագահները հանդիպեցին, սակայն Լևոն Տեր-Պետրոսյանը հիպնոսի միջոցով այնպես չարեց, որ ամեն ինչ իր ուզածով լինի՝ Աղազարյանն արձագանքեց. «Հիպնոսը հո ամեն մեկի վրա չի ազդում: Բերեցիք, Ռոբերտ Քոչարյանին համեմատեցիք իմ հետ, իր վրա, իհարկե, չի ազդի»: