Հայաստանի խորհրդարանն առաջին ընթերցմամբ օրենսդրական մի շարք փոփոխություններ է հաստատել
Հայաստանի Ազգային ժողովի մայիսի 6-ի նիստին պատգամավորները երկրորդ եւ վերջին ընթերցմամբ հաստատել են «Ժամկետային զինվորական ծառայություն կամ այլընտրանքային ծառայություն չանցած, ուսումնական հավաքներից կամ մոբիլիզացիոն զորակոչից խուսափած անձանց համար համաներում հայտարարելու մասին» օրենքը:
Բացի այդ, խորհրդարանականներն առաջին ընթերցմամբ մի շարք այլ օրինագծեր են հաստատել:
Այդ թվում.
«Օտարերկրացիների մասին» օրենքում եւ հարակից օրենքներում փոփոխություններ եւ լրացումներ կատարելու մասին օրինագծերի փաթեթը,
«Սեփականության իրավունքի պետական գրանցման մասին» օրենքում փոփոխություններ կատարելու մասին,
«Հայաստանի Հանրապետության կենտրոնական բանկի մասին» օրենքում փոփոխություններ կատարելու մասին,
«Փողերի լվացման եւ ահաբեկչության ֆինանսավորման դեմ պայքարի մասին» օրենքում փոփոխություններ եւ լրացումներ կատարելու մասին:
Խորհրդարանականները նաեւ վավերացրել են «Թմրամիջոցների, հոգեմետ նյութերի եւ բաղադրիչների ապօրինի շրջանառության դեմ պայքարում Անկախ պետությունների համագործակցության անդամ պետությունների համագործակցության մասին» «2000 թվականի նոյեմբերի 30-ի պայմանագրում փոփոխություններ կատարելու մասին» Արձանագրությունը:
«Արմենպրես»-ի փոխանցմամբ՝ այն խորհրդարանի նիստում ներկայացրել էր ՀՀ ոստիկանության պետի տեղակալ Արա Ֆիդանյանը:
Կատարվող փոփոխությունները նպատակ ունեն կատարելագործելու թմրամիջոցների, հոգեներգործող նյութերի եւ դրանց բաղադրիչների ապօրինի շրջանառության դեմ պայքարի ոլորտում ԱՊՀ պետությունների միջև համագործակցությունը: Համաձայնագրում լրացվում են օգտագործվող հասկացությունների սահմանումները, նախատեսվում են ԱՊՀ մասնակից պետությունների միջև թմրամիջոցների, հոգեներգործող նյութերի, դրանց բաղադրիչների ապօրինի շրջանառության դեմ պայքարի ոլորտում համագործակցության առավել մանրամասն կարգավորումներ, պետությունների միջև տեղեկատվության փոխանակման կատարելագործմանն ուղղված դրույթներ:
Փոփոխությունների արդյունքում նախատեսվում են իրավական հիմքեր` օպերատիվ հետախուզական եւ այլ միջոցառումների անցկացման նպատակով համատեղ օպերատիվ քննչական խմբեր ստեղծելու և օպերատիվ հետախուզական միջոցառումների շրջանակն ընդլայնելու վերաբերյալ:
Արձանագրությունն արդեն ուժի մեջ է մտել Բելառուսի, Ղազախստանի, Մոլդովայի և Տաջիկստանի համար:
Ազգային ժողովն արձանագրությունը վավերացրեց միաձայն՝ 84 «կողմ» ձայնով: