Այո, պատրաստվել ենք պատերազմի և դրանով դրդել ենք պատերազմ․ Նիկոլ Փաշինյան

Պատերազմին պատրաստվելն ունի նրբություններ, որովհետև հակառակորդն էլ է հետևում քեզ, ինքը տեսնում է, որ դու գնում ես դեպի մի գիծ, որ 1980-ականների զենքերից անցում ես կատարում 2020-ականների զենքերի: Այս մասին մայիսի 5-ին, ԱԺ-ում կառավարության հետ հարց ու պատասխանի ժամանակ ասել է Նիկոլ Փաշինյանը՝ անդրադառնալով «Իմ քայլը» խմբակցության պատգամավոր Վիկտոր Ենգիբարյանի՝ պատերազմին պատրաստվելու մասին հարցին։

«Ինքը հասկանում է, որ եթե դու այդ գիծը անցար, քո ներուժն աճելու է: Ինքը հասկանում է, որ ճիշտ ժամանակն է խփելու, որ դու չհասցնես, մնաս 80-ականների զենքի մակարդակին: Սա էլ է պատերազմի հրահրում: Դու չես կարող բանակը զարգացնել թաքուն: Հակառակորդը տեսնում է, որ սպաների աշխատավարձ է բարձրանում էականորեն, զինվորների սննդի հարց է լուծվում, ժամկետային զինծառայողների ծնողները, ենթասպաների ու շարքայինների ընտանիքների անդամները ներառվում են բուժսպասարկման պետպատվերում: Սա մարտունակության հետ կապված հարց է: Ձեռք են բերվում ժամանակակից զինատեսակներ: ՍՈւ-երի հետ կապված պատմությունը դրա տիպիկ օրինակն է:

Հարվածը հասցվել է այն պահին, երբ սպառազինությունն ամբողջական չի եղել: Այո, ՍՈՒ-30 գերժամանակակից զենք առնելով՝ մենք հրահրել ենք պատերազմը»,-ասաց նա:

Փաշինյանի խոսքով, նախորդ իշխանությունը պատերազմի ռիսկը կառավարել է՝ ամեն ինչ անելով, որպեսզի տեսանելիորեն բանակը փլվի:

«Ինչու է հակառակորդը հարձակվել, որովհետև հակառակորդը տեսել է, որ մենք 80-ականների զենքերի էջը փակում ենք, մենք ենք հայտարարել, ես եմ հայտարարել 2020 թվականի ամանօրյա ուղերձում։ Եթե տեսնեին, որ մեր բանակը շարունակում է փլուզվել, քանդվել, էլ չեմ ասում՝ հազար ու մի բաներ։ Այո պատրաստվել ենք պատերազմի և դրանով դրդել ենք պատերազմ, քանի որ հակառկորդը տեսնում է, որ աճում ես, մի գիծ, որ անցավ, էլ հետ գալ չի լինի»,–ասաց նա։

Նիկոլ Փաշինյանը նշեց, որ պատերազմից խուսափելու ամենակարևոր բանը համապատասխան ռազմական բալանսն է և հավելեց, որ իրենք երկու տարվա ընթացքում փորձել են վերականգնել 20 տարում կորսված ռազմական բալանսը. «Միայն այս տեմպի բերումով չէինք կարող անտեսանելի լինել հակառակորդի համար»: