Քրգործը հարուցվել է մասնագիտական գործունեությունը խոչընդոտելու մասով, սակայն ակնկալում էինք, որ պետք է դիտարկվեր նաև մտերիմ անձանց նկատմամբ սպառնալիք հնչեցնելը․ Անի Գևորգյան (տեսանյութ)

Ինձ վերաբերող գրառման մասով գործը հարուցվել է ՔՕ 164-րդ հոդվածի հատկանիշներով: Այս մասին այսօր լրագրողների հետ զրույցում ասաց լրագրող Անի Գևորգյանը՝ նշելով, որ քրեական գործի շրջանակներում նրան փոխանցվել է միայն տուժող ճանաչվելու որոշումը:

Հիշեցնենք, որ ԱԺ փոխնախագահ Ալեն Սիմոնյանը դատարան էր դիմել այն բանից հետո, երբ լրագրող Անի Գևորգյանը հայտարարել էր, թե կարծում է՝ իր և իր մանկահասակ երեխայի հասցեին սոցցանցով կատարված սպառնալիքների հետևում Ալեն Սիմոնյանն է կանգնած:

Ալեն Սիմոնյանը հայտարարել էր՝ պատրաստ է զրպարտչական հայտարարության կապակցությամբ դատարանում իր իրավունքները պաշտպանել ու պատասխանատվության ենթարկել իրեն արատավորող և կեղծ տեղեկատվություն տարածող անձանց:

Անի Գևորգյանը նշեց, որ ըստ հոդվածի՝ նշանակում է, որ քրեական գործը հարուցվել է մասնագիտական գործունեությունը խոչընդոտելու մասով: «Մենք ակնկալում էինք, որ պետք է դիտարկվեր նաև մտերիմ անձանց նկատմամբ սպառնալիք հնչեցնելը, բայց մանրամասնեցին, որ այստեղ խնդիրը սուբյեկտիվ և օբյեկտիվ ընկալման մեջ է, նաև սպառնալիքը իրականում կամ սոցցանցում հնչեցնելու մեջ է, այսինքն, եթե իմ երեխային կամ ինձ սպառնային իրական կյանքում՝ մեր կողքին լինելով, այդ դեպքում սա կլիներ առավել շոշափելի»,– ասաց նա:

Լրագրողը նշեց, որ այս պահին ինքը դեռ չի հարցաքննվել, սակայն քննիչը նրան փոխանցել է, որ գործի նախաքննության փուլում վերջինս չի կարող գործի վերաբերյալ ամբողջ տեղեկություններին տիրապետել: «Այսինքն, ես նույնիսկ չգիտեմ՝ իրենք պարզե՞լ են, օրինակ, «Նարեկ Շահնազարյան» տվյալներով օգտատերը, որը տարածել է իմ և իմ երեխայի լուսանկարը, իրական օգտատեր էր, թե ոչ, ինձ սա չեն փոխանցել՝ ելնելով նախաքննական գաղտնիքները պահպանելու իրավունքից»:

Անի Գևորգյանը, ևս մեկ անգամ խոսելով իրադարձությունների և դրանց Ալեն Սիմոնյանի հավանական մասնակցության մասին, նշեց, որ եղել են մամուլի բազմաթիվ հրապարակումներ, որոնցում գրվել է, որ Ալեն Սիմոնյանը կապ ունի «ֆեյքերի ֆաբրիկայի» հետ: «Սրանք ինձ թույլ են տալիս այդպես մտածել և եթե հիշեք այս ամենին նախորդած պատմությունը, նրա պահվածքը, ապա անգամ մի պահ վախեցնող էր նրա վարքագիծը»,- ասաց Գևորգյանը և հավելեց, որ մնացյալ մանրամասները քննարկելու է փաստաբանի հետ:

Մանրամասները՝ տեսանյութում։