Մալիի 25-ամյա բնակչուհին միանգամից 9 երեխա է լույս աշխարհ բերել (լուսանկար)

Արևմտյան Աֆրիկայում գտնվող Մալիի բնակիչը միանգամից 9 երեխա՝ 5 աղջիկ և 4 տղա է լույս աշխարհ բերել:

Այս մասին գրում է «ՌԻԱ Նովոստի»-ն, նշելով՝ մայրն ու նորածիններն իրենց լավ են զգում:

Մալիի առողջապահության նախարարության տվյալներով՝ Հալիմա Սիսեն, Մալիի մայրաքաղաք Բամակոյի հիվանդանոցում 2 շաբաթ մնալուց հետո, մարտի վերջին երկրի նախագահ Բա Նդաուի հրամանագրով տեղափոխվել էր Մարոկկոյի կլինիկա:

«Առողջապահության և սոցիալական զարգացման նախարարը ուրախ է տեղեկացնել, որ 2021 թվականի մայիսի 4-ին Հալիմա Սիսեն կեսարյան հատմամբ լույս աշխարհ է բերել ինը նորածնի՝ յոթի փոխարեն, որի մասին նախապես հայտնել էին ինչպես Մալիում, այնպես էլ Մարոկկոյում՝ հիմնվելով 2 երկրներում կատարված ուլտրաձայնային հետազոտությունների արդյունքների վրա: Նորածինները և մայրիկը լավ են զգում», - ասվում է գերատեսչության հայտարարության մեջ:

Մալիի առողջապահության նախարար Ֆանտա Սիբին շնորհավորել է փոքրիկների ծնունդն ընդունող առողջապահության ոլորտի մասնագետներին և նշել, որ նրանց «պրոֆեսիոնալիզմն այս հղիության երջանիկ հանգուցալուծման բանալին էր»:

Նորածինների մայրը 25 տարեկան է: Մի քանի շաբաթից նրանք կարող են տուն վերադառնալ:

Մարոկկոյի առողջապահության նախարարության ներկայացուցիչ Ռաշիդ Կուդհարին ասել է, որ վստահ չէ, թե երկրում նախկինում նման հազվագյուտ երևույթ արդյոք տեղի ունեցել է, թե ոչ: