на Русском
Շուշիի Կանաչ ժամ եկեղեցին ավերելով՝ Ադրբեջանը... 
Մայիսի 1-ից տեսանկարահանող կամ լուսանկարահանո... 
Ադրբեջանը մշակութային ցեղասպանություն է իրականացնում. ՀՀ ԱԳՆ արձագանքը չպիտի սահմանափակվի զուտ հայտարարությամբ. փորձագետ
Այսօր Ադրբեջանն արգելում է միջազգային կազմակերպությունների, այդ թվում՝ ՅՈՒՆԵՍԿՕ-ի մուտքը օկուպացված տարածքներ և իրականացնում քայլեր, որոնք չունեն այլ բնորոշում, քան մշակութային ցեղասպանություն: Այս մասին Tert.am–ի հետ զրույցում նշել է «Հայացք» վերլուծական կենտրոնի փորձագետ Հերմինե Մխիթարյանը՝ անդրադառնալով Ադրբեջանի կողմից օկուպացված տարածքներում իրականացվող «վերականգնողական աշխատանքներին»:
«Պատերազմի ավարտից օրեր անց Ադրբեջանը հայտարարեց իր վերահսկողության տակ անցած տարածքներում վերականգնողական աշխատանքներ սկսելու մասին: Բաքվի այս քաղաքականությունը միանգամից մի քանի նպատակ էր հետապնդում, այդ թվում՝ արտաքին աշխարհից ներդրումներ բերելու, բիզնես շահով որոշ տեղերում նաև քաղաքական խնդիրներ լուծելու նպատակներ: Բայց, ի թիվս այլնի, կարևոր նպատակ է նաև օկուպացված տարածքներից հայկական հետքը ջնջելը, ինչն իրականացվում է աննախադեպ արագությամբ ու հետևողականությամբ», - նշեց փորձագետը:
Մխիթարյանի կարծիքով՝ Շուշիի Սուրբ Ղազանչեցոցի գմբեթի հեռացումը հերթական ահազանգն է, ինչի ուղղությամբ բավական շատ աշխատանք ունենք անելու. «Չի բացառվում, որ Ադրբեջանը կարճ ժամանակ անց նորից կտեղադրի գմբեթները և կհիմնավորի դրանց հանելը զուտ վերականգնողական աշխատանքներով, բայց սա միայն այն պարագայում, եթե ստանա ճնշումներ միջազգային հանրությունից: Հակառակ պարագայում կմարսի նաև այս քայլն ու վանդալիզմի դեպքերը շարունակական կլինեն», - նշեց փորձագետը:
«Երեկ ունեցանք նաև ՀՀ ԱԳՆ արձագանքը, որն արդարացիորեն բարձրացնում էր առկա խնդիրները: Բայց պիտի հասկանանք, որ արտաքին քաղաքական գերատեսչության արձագանքը չպիտի սահմանափակվի միայն հայտարարություններով: Մենք աշխատանքի լայն դաշտ ունենք: Այսօր Ադրբեջանն արգելում է միջազգային կազմակերպությունների, այդ թվում՝ ՅՈՒՆԵՍԿՕ-ի մուտքը օկուպացված տարածքներ և իրականացնում քայլեր, որոնք չունեն այլ բնորոշում, քան մշակութային ցեղասպանություն: Եվ Բաքվի կողմից իրականացվող այս մշակութային ցեղասպանության դեմ պայքարի առաջամարտիկը պիտի դառնա հենց Հայաստանի Հանրապետությունը՝ իր բոլոր ինստիտուտներով, մարմիններով ու կառույցներով», - ամփոփեց փորձագետը:
