10-15 մլն դոլար. աշխարհում ամենահայտնի և 165 տարվա վաղեմություն ունեցող նամականիշն աճուրդի կհանվի
Առաջին հայացքից հին թղթի կտոր հիշեցնող, բայց իրականում 165 տարվա վաղեմություն ունեցող British Guiana One-Cent Magenta եզակի նամականիշը հունիսին աճուրդի կհանվի 10-15 մլն դոլարով, գրում է The Guardian-ը։
Նշվում է, որ աշխարհում ամենահայտնի և արժեքավոր նամականիշը ստեղծվել է 1856 թվականին։
«Սա ֆիլատելիայի (նամականիշների, ծրարների, բացիկների և փոստային այլ նյութերի հավաքումը, մշակումը և հետազոտումը- Tert.am) Մոնա Լիզան է»,- հայտնել է ֆիլատելիայի փորձագետ Դեյվիդ Բիչը:
Իր տեսակի մեջ եզակի նամականիշը ստեղծվել է բրիտանական Գվիանայում, այժմ՝ Գայանա, երբ Անգլիայից ներկրվող նամականիշների պակասը սպառնում էր խաթարել գաղութի փոստային ծառայության աշխատանքը:
Երկար տարիներ ձեռքից ձեռք անցնելուց հետո նամականիշը, ի վերջո, հայտնվել է դիզայներ Ստյուարտ Վեյցմանի մոտ և այս տարվա հունիսին կհանվի աճուրդի։