Փաշինյանը սեփական կամքով չընտրվեց վարչապետ. Коммерсантъ-ի անդրադարձը

Ռուսական «Կոմերսանտ» պարբերականը հոդված է հրապարակել, որում անդրադարձել է մայիսի 3-ին ՀՀ Ազգային ժողովում վարչապետ ընտրելու փորձին:

Հոդվածում մասնավորապես ասվում է, որ երկուշաբթի Հայաստանի խորհրդարանում տեղի է ունեցել կանխատեսելի և բեմադրված, բայց միևնույն ժամանակ անհրաժեշտ իրադարձություն. Նիկոլ Փաշինյանի պաշտոնանկությունից հետո նոր վարչապետ ընտրելու առաջին փորձը: Կար մի թեկնածու` Փաշինյանը, որը, չնայած խորհրդարանում իր աջակիցների բավարար թվին, չի ընտրվել, քանի որ այդպիսին էին քաղաքական պայմանավորվածությունները:

Այն բանից հետո, երբ Նիկոլ Փաշինյանը հրաժարական է տվել և իր պաշտոնին կից ստացել է «ժամանակավոր պաշտոնակատար» նախածանցը, խորհրդարանը պետք է 2 անգամ փորձի նշանակել կառավարության նոր ղեկավար, որից հետո, ըստ Սահմանադրության, երկրում նշանակվում են արտահերթ խորհրդարանական ընտրություններ: Դա հենց այն է, ինչին ձգտում են հայ քաղաքական գործիչները, որոնք ձախողել են առաջին քվեարկությունը և գրեթե անկասկած տապալելու են հաջորդը, որը տեղի կունենա մայիսի 10-ին: Հայաստանի Սահմանադրությունը չի նախատեսում արտահերթ ընտրություններ նշանակելու ավելի պարզ ուղի:

75 պատգամավոր սեղմել է «ձեռնպահ» կոճակը, 3-ը դեմ է քվեարկել, և միայն 1-ը՝ կողմ: Հատկանշական է, որ գրեթե բոլոր ընտրողները իշխող «Իմ քայլը» դաշինքից էին: Քանի որ ընդդիմադիր խմբակցություններից մեկը՝ «Բարգավաճ Հայաստանը», բոյկոտել էր նիստը, իսկ մյուսը՝ «Լուսավոր Հայաստանը», պարզապես չի քվեարկել:

Ավելի վաղ ընդդիմության շրջանակները քննարկում էին այն միտքը, որ այս խմբակցություններից մեկը կարող է առաջադրել իր թեկնածուին, որպեսզի եթե չխափանեն Նիկոլ Փաշինյանի ծրագրերը, ապա գոնե ուշադրություն գրավեն իրենց վրա: Սակայն գոնե երեկվա քվեարկության ժամանակ դա տեղի չի ունեցել: Ինչպես նախազգուշացրել է ինքը՝ Նիկոլ Փաշինյանը քվեարկությունից առաջ ՝ ելույթ ունենալով պատգամավորների առջև, եթե դա տեղի ունենա, «Իմ քայլը» խմբակցությունը պարզապես կընտրի նոր վարչապետ», այսինքն՝ իրեն:

Չնայած քվեարկության ձևական լինելուն, Փաշինյանը փորձել է իր խոսքը օգտագործել խորհրդարանական ամբիոնից ՝ առավելագույնս ի օգուտ իրեն: Նա մեկ անգամ ևս քննադատել է երկրի նախկին ղեկավարությանը՝ նախկին նախագահ Սերժ Սարգսյանի գլխավորությամբ՝ փաստացիորեն նրանց մեղադրելով Լեռնային Ղարաբաղի պատերազմում կրած պարտության համար: «Հակամարտության կարգավորման բանակցությունների տրամաբանությունն ու բովանդակությունը փոխվել է ոչ թե իմ իշխանության գալով, ինչպես պնդում է Սերժ Սարգսյանը, այլ 2015-ի աշնանից 2016-ի ձմեռ ժամանակահատվածում, որին հաջորդել է ապրիլյան պատերազմը»,-ասել է նա: Նրա խոսքերով ՝ «դա հաստատող բազմաթիվ փաստաթղթեր կան»:

Ցույց տալով, որ ինքը, իր հերթին, հոգ է տանում երկրի անվտանգության մասին, Նիկոլ Փաշինյանն անդրադարձել է իրավիճակին Հայաստանի Սյունիքի մարզում, որտեղ այժմ գտնվում է Ադրբեջանի հետ փաստացի սահմանը: Փաշինյանը հայտարարել է, որ «այնտեղ ստեղծվել է 102-րդ ռուսական ռազմաբազայի 2 հենակետ»՝ սա անվանելով «լրացուցիչ երաշխիք ոչ միայն Սյունիքի մարզի, այլև ամբողջ Հայաստանի անվտանգությունն ապահովելու համար»: Հիշեցնենք, որ վերջերս Սյունիքի մարզ կատարած այցը խայտառակ իրադարձություն էր դարձել Նիկոլ Փաշինյանի համար. տեղի բնակիչները պարզապես ամոթալի կերպով են վռնդել նրան իրենց քաղաքներից ու գյուղերից: