«Կառավարությունից վստահություն կունենամ այն ժամանակ, երբ բնակարան ունենամ». Քարվաճառցիները բողոքի ակցիա արեցին, նրանց հանդիպել է Մհեր Գրիգորյանը (տեսանյութ)

Քաշաթաղի շրջանից տեղահանված բնակիչներն այսօր Կառավարության շենքի դիմաց էին, նրանք բողոքի ակցիա էին սկսել՝ ներկայացնելով, որ Կառավարության կողմից որևէ առաջկցություն չի տրամադրվում տեղահանվածներին, անտարբեր են քաղաքացիների նկատմամբ:

Քաշաթաղի շրջանի Միջնավանի քաղաքապետարանի քարտուղար Մարիամ Հայրապետյանը նշեց, որ այսօր բնակիչերի հետ հավաքվել են Կառավարության դիմաց, քանի որ անելանելի վիճակում են:

Նշենք, որ քաղաքացիներին մոտեցավ վարչապետի օգնական Նաիրի Սարգսյանը, առաջարկեց հիմա բարձրանալ Կառավարության շենք, քննարկել հարցը և եթե պատասխանը չբավարարի, արդեն հանդիպում կկազմակերպվի Նիկոլ Փաշինյանի հետ:

Մի քանի քաշաթաղցիներ Սարգսյանի հետ մտան Կառավարության շենք՝ հարցի քննարկման:

Քննարկումից հետո Քաշաթաղի շրջանի Միջնավանի քաղաքապետարանի քարտուղար Մարիամ Հայրապետյանը նշեց, որ հերթական անգամ Կառավարության կողմից փորձել են իրենց խաղաղեցնել, և այս անգամ ևս պատրաստ են զիջման գնալ:

Հայրապետյանը նշեց, որ մինչև մայիսի վերջ կսպասեն, քանի որ խոստացել են՝ այդ ընթացքում խնդիրը կլուծվի, սակայն եթե խոստմանը հավատարիմ չլինեն, ապա քաշաթաղցիները պատրաստ են մինչև Եվրոպական դատարան գնալուն: Վերջինս նաև նշեց՝ իրենց խոստացել են, որ քաշաթաղցիները ևս կընդգրկվեն տարվող աշխատանքների խմբերում:

Հանդիպման մասնակիցներից Արմեն Չումոյանը, որը Քաշաթաղի շրջանի Հայկազյան համայնքի ղեկավարն է, լրագրողներին փոխանցեց, որ հանդիպման ընթացքում քննարկվել է լուծումների հարցը: «Մենք հանդիպեցինք Մհեր Գրիգորյանի և Արցախի պետնախարար Գրիգորի Մարտիրոսյանի հետ, մեզ հավաստիացրին, որ մինչև մայիսի վերջ որոշումների նախագիծ կլինի, որը կդրվի հանրային քննարկման»:

Արմեն Չումոյանը նշեց՝ անկախ նրանից, որ այսօր քաշաթաղցիներն էին եկել Կառավարություն՝ աջակցման տրամադրումը պետք է վերաբերի բոլոր արցախցիներին, որոնք նույն խնդրի առաջ են:

Քաղաքացիներից մեկը նշեց, որ այս պահին միևնույն է՝ որևէ պատասխան նրանց չի բավարարում, քանի որ հսկայական ունեցվածք են կորցրել, ինչպես նաև իրենց արժանապատվության հարցն է առաջ գալիս, քանի որ կորցրել են այն հողերը, որոնք պահել էին: «Կառավարությունից վստահություն կունենամ այն ժամանակ, երբ բնակարան ունենամ»: