ՆԱՏՕ-ի ակտիվությունը զսպելու նպատակով ՌԴ Հարավային ռազմական շրջանը կհամալրվի Սու-35Ս կործանիչներով
Ռուսաստանի ԶՈւ Հարավային ռազմական շրջանի ուժերը կհամալրվեն Սու-35Ս կործանիչներով` Սևծովյան տարածաշրջանում և Կովկասում ՆԱՏՕ-ի ակտիվությունը զսպելու նպատակով: Այս մասին հայտնում է Военное обозрение պարբերականը` հղում անելով ՌԴ պաշտպանության նախարարության աղբյուրներին:
ՌԴ ռազմական գերատեսչությունը որոշում է կայացրել բազմանպատակային կործանիչներով ուժեղացնել Հարավային ռազմական շրջանը, որի սպառազինման կազմում մինչ այս պահը Սու-35Ս կործանիչներ ընդգրկված չեն եղել:
Նորագույն ինքնաթիռներով կհամալրվի օդային ուժերի 31-րդ գունդը, որը տեղակայված է Ռոստովի մարզի Միլլերովո շրջանում: ՊՆ ծրագրով նախ սպառազինման համալրում տեղի կունենա մեկ էսկադրիլային գնդում, սակայն չի նշվում, թե երբ կմատակարարվեն ինքնաթիռները:
Ռազմական փորձագետների տվյալներով` Սու-35Ս օդանավերի կիրառումը Ռուսաստանի հարավային շրջանում կմեծացնի ավիացիայի մարտունակությունը, քանի դրանք Սու-30ՍՄ օդանավերին գերազանցում են մի շարք չափանիշներով, այդ թվում` հեռահարության և սպառազինման: