Խոսքը վերաբերել է մասնագիտական քննարկումների․ Արթուր Դավթյանը՝ վարչապետի օգնական Աննա Վարդապետյանի կողմից վարույթ իրականացնող մարմնի գործողություններին միջամտության մասին
Մենք ունենք մեծ թվով դատական ակտերի վիճարկումներ, բողոքարկումների թվի աճ, դատավորներին կարգապահական պատասխանատվության ենթարկելու աննախադեպ թվի միջնորդություններ։ Հետևությունները թողնում եմ ձեզ։ Այս մասին ԱԺ-ում լրագրողների հետ ճեպազրույցում ասաց ՀՀ գլխավոր դատախազ Արթուր Դավթյանը՝ անդրադառնալով հարցին՝ ինչպե՞ս են դատարանները հիմա աշխատում։
Անդրադառնալով հարցին, թե վարչապետի օգնական Աննա Վարդապետյանի՝ քրեական վարույթ իրականացնող մարմնի գործողություններին միջամտության վերաբերյալ փաստեր են հրապարակվել, Դավթյանն արձագանքեց․
«Այդ փաստերը մենք անարձագանք չենք թողել, ուղարկել ենք վարույթ իրականացնող մարմին, դրա մի մասով քրեադատավարական գործընթաց է իրականացվել, մի մասով իրականացվում է։ Այն մասով, որով կայացվել է որոշում, մենք գտել ենք, որ այդտեղ հանցագործության դեպք չկա»,-ասաց նա։
Հիշեցնենք, որ մոտ մեկ ամիս առաջ հրապարակվեց տեսանյութ, որտեղ երևում է «Աննա Վարդապետյան» անուն-ազգանունով օգտատիրոջ ուղարկած մի էլեկտրոնային նամակ, որում ենթադրաբար Հայաստանի ֆուտբոլի ֆեդերացիան 16 տարի ղեկավարած Ռուբեն Հայրապետյանի և նրա որդու քրգործի վերաբերյալ նյութերն են։ Փաստաթղթի աջ անկյունում երևում է, որ այդ նյութերը խմբագրել է «Աննա Վարդապետյան» անուն-ազգանունով օգտատերը։ ԱԱԾ քննչական դեպարտամենտը քրեական գործի հարուցումը մերժել էր։
Դիտարկմանը՝ այսինքն՝ իր կարծիքով՝ վարչապետի աշխատասենյակից ցանկացած մեկը կարող է նախկին իշխանության կամ ցանկացած քաղաքացու վերաբերյալ քրգործերին միջամտություն ցուցաբերել, Դավթյանն արձագանքեց՝ դա չէ փաստը․ «Փաստն այն է, ինչ վարույթի ընթացքում պարզվել է։ Խոսքը վերաբերել է մասնագիտական քննարկումների»,-նշեց նա:
Հարցին՝ բարի կամքի դրսևորո՞ւմ է թույլ տվել Վարդապետյանը, Դավթյանն արձագանքեց՝ այո։ «Ես հետևել եմ կայացված որոշման նկատմամբ դատախազական հսկողությանը և եկել եմ հետևության, որ այդ փաստով կայացված որոշումն օրինական է, և այն վերացնելու հիմքեր չկան»,-ասաց նա։