COVID-19-ի դեմ պատվաստանյութերի համար ընդհանուր գլոբալ ծախսերը մինչեւ 2025թ․ 157 միլիարդ դոլար կկազմեն

COVID-19-ի դեմ պատվաստանյութերի համար ընդհանուր գլոբալ ծախսերը մինչեւ 2025թ․ կկազմեն 157 միլիարդ դոլար` իրականացվող զանգվածային պատվաստումների եւ «վերապատվաստումների» ծրագրերի հաշվին, որոնք սպասվում են երկու տարին մեկ: Այս մասին ասվում է ամերիկյան IQVIA Holdings Inc. ընկերության զեկույցում:

Զեկույցի համաձայն՝ COVID-19-ի դեմ պատվաստումների առաջին ալիքը 2022թ․ վերջին կընդգրկի աշխարհի բնակչության մոտ 70%-ը: Կրկնակի պատվաստումները, ամենայն հավանականությամբ, կկատարվեն սկզբնական պատվաստումից հետո երկու տարին մեկ: Զեկույցում ասվում է, որ կանխատեսումը հիմնված է պատվաստանյութերի ազդեցության տեւողության ընթացիկ տվյալների վրա, հայտնում է Reuters-ը:

ԱՄՆ-ը պատրաստվում է նրան, որ վերապատվաստում կպահանջվի 9-12 ամիսների ընթացքում՝ այն բանից հետո, երբ մարդիկ կստանան COVID-19-ի դեմ իրենց առաջին լիարժեք պատվաստումները, այս ամսվա սկզբին հայտարարել է Սպիտակ տան ներկայացուցիչը: Pfizer Inc-ը նաեւ հայտարարել է, որ խթանիչներ հնարավոր է պահանջվեն 12 ամսվա ընթացքում:

Ակնկալվում է, որ այս տարի պատվաստանյութերի ծախսերն ամենաբարձրը կլինեն եւ կկազմեն 54 միլիարդ դոլար, քանի որ ամբողջ աշխարհում պատվաստումների զանգվածային արշավներ են սկսվում: Դրանից հետո, ըստ IQVIA-ի ավագ փոխնախագահ Մյուրեյ Էյթկենի, սպասվում է, որ 2025թ. դրանք իջնեն մինչեւ 11 միլիարդ դոլար, քանի որ աճող մրցակցությունը եւ պատվաստանյութերի ծավալները կհանգեցնեն գների անկման։

IQVIA-ի տվյալներով՝ COVID-19-ի դեմ պատվաստանյութերի ծախսերի կանխատեսումը կազմում է այդ ժամկետում բոլոր նշանակված դեղերի համար կանխատեսված 7 տրիլիոն դոլարի 2%-ը:

Ըստ զեկույցի՝ առանց COVID-19-ի դեմ պատվաստանյութի արժեքի, ընդհանուր առմամբ առողջապահական ծախսերը 2020-2025 թվականներին՝ վեց տարվա ընթացքում 68 միլիարդ դոլարով պակաս կլինեն, քան կլինեին առանց համավարակի:

Զեկույցում նշվում է, որ համավարակը մեծ խափանումներ է առաջացրել բժիշկների այցելությունների, պրոցեդուրաների եւ դեղամիջոցների օգտագործման մեջ, ինչը հանգեցրել է որոշ դեղերի կուտակմանը առաջին օրերին, այնուհետեւ ավելի նորմալ միտումների վերադարձին: «Չնայած COVID-19-ի դեմ պատվաստանյութերը հաջորդ հինգ տարիների ընթացքում 157 միլիարդ դոլար կարժենան,- ասել է Էյթկենը, - Սա շատ ցածր գին է` համեմատած համավարակից մարդկային կորուստների հետ»: