Նախարարության բոլոր կառույցներում փոփոխություններ են արվում՝ որոշ բաժիններ, որոնք արդիական չեն, փակվում են. Վահան Քերոբյանը բողոքի ակցիայի մասին (տեսանյութ)

Մեր գործունեության ընթացքում փորձում ենք լինել, ինչքան հնարավոր է, արդյունավետ, որ ստեղծենք բարձր արժեք: Նախարարության բոլոր կառույցներում փոփոխություններ են արվում՝ որոշ բաժիններ, որոնք արդիական չեն, փակվում են, որոշ բաժիններ ստեղծվում են: Մենք չունենք արտահանման համար պատասխանատու վարչություն, հիմա դա ստեղծում ենք. այսօր լրագրողների հետ զրույցում ասաց Էկոնոմիկայի նախարարի ԺՊ Վահան Քերոբյանը՝ անդրադառնալով հարցին, թե Էկոնոմիկայի նախարարության մի շարք աշխատակիցներ բողոքի ակցիա են անում, ասում են, որ դուք օպտիմալացումներ եք անում՝ առանց հիմնավորման.

«Այս պահին մեր ջանքերն ուղղված են գյուղատնտեսության արտադրողականությանը բարձրացնելուն: Մենք մեծ ջանք ենք ներդրում՝ գյուղերում ոչ գյուղատնտեսական աշխատատեղեր ստեղծելու համար, որպեսզի մարդիկ դատապարտված չլինեն միայն գյուղատնտեռսությամբ զբաղվել, այլ ունենան այլ գործերով զբաղվելու հնարավորություններ: Օրինակ՝ երեկ այցելել եմ Արմավիրի գյուղ, որտեղ մի ներդրող մեծ ջրային պարկ է ստեղծու, որտեղ 160 հոգի աշխատանք են ունենալու»,-նշեց նախարարի ԺՊ-ն:

Անդրադառնալով օպտիմալացման արդյունքում աշխատակիցների դժգոհություններին՝ Քերոբյանն ասաց, որ իրենց նպատակը չէ, որ աշխատատեղերը քչացնեն, հակառակը՝ ամեն ինչ անում են, որ աշխատատեղերը կտրուկ շատանան.

«Շատ ենք խոսում, որ պետք է տնտեսության արտադրողականությունը բարձրացնել, և դա ոչ պակաս ձևով վերաբերում է պետական համակարգին: Իհարկե, կարելի է ոչինչ չանել և ասել՝ ստատուս քվոն ոնց կա, տենց շարունակվի, բայց դա մեր երկրին չի տանի զգալի առաջընթացի, որն անձամբ իմ պլանների մեջ չի մտնում: Ես եկել եմ աշխատելու, որ, ինչքան հնարավոր է, արագ մեր երկիրը զարգանա»:

Անդրադառնալով հարցին, որ Ռոբերտ Քոչարյանն ասել, է, որ Հայաստանում ներդրումներ չեն ցանկանա անել և ասել է, որ Թուրքիայի հետ սահմանը բացելը վատ վիճակում կդնի գյուղացիներին՝ հատկապես Արարատյան դաշտի, Քերոբյանը պատասխանեց.

«Այն մարդիկ, որոնք փորձում են ֆոն ստեղծել Հայաստանում, որ ամեն ինչ վատ է, այդ մարդիկ, որևէ կապ չունեն իրական թվերի հետ: Տնտեսական աճը մարտին այդքան էլ ինձ չի գոհացնում, մեր հաշված 7, 7.5 –ի փոխարեն, նախնական տվյալներով, 3.8 տոկոս է հայտարարվել, բայց դա միևնույն է, ապահովելու է երկնիշ տնտեսական աճ: Իսկ Թուրքիայի սահմանի բացման հարց առայժմ օրակարգում չկա: Երկարացնելու ենք թուրքական ապրանքների ներմուծման արգելքը: Ավելացնելու ենք նաև թուրքական ապրանքների վաճառքի արգելքը, որովհետև որոշակի զարտուղի ճանապարհներով կարողանում են ապրանք ներմուծել, պետք է խստացնել»:

Հարցին, թե եթե երկնիշ տնտեսական աճ մինչև տարվա վերջ չապահովեք, ինչ եք անելու, նախարարի ԺՊ-ն ասաց՝ հրաժարական եմ տալու, գո՞հ եք:

Հիշեցնենք, ավելի վաղ հայտնել էինք, որ Էկոնոմիկայի նախարարության գյուղատնտեսության խորհրդատվության նորարությունների և մոնիտորինգի վարչության մարզային բաժինների 69 հաստիք կրճատվում է. աշխատակիցները ակցիա էին անում կառավարության մոտ։

Քերոբյանը հենց դարձավ նախարար, որոշեց, որ մեր վարչությունը պետք չէ, մեզ կրճատեց. Բողոքի ակցիայի մասնակիցներին հանդիպեց նախարարը