Հավատացնում եմ, որ մեղադրյալի ու տուժողի տեղերը միանգամից փոխվելու են իշխանափոխությունից հետո. Նարեկ Սամսոնյանը՝ Արթուր Դանիելյանի և Ալեն Սիմոնյանի դատական նիստի մասին (տեսանյութ)

Դատավորն Արթուր Դանիելյանի մեղադրանքի նիստը դրեց ընտրություններից հետո, սա նույն դատավորն է, որն իմ կարծիքով՝ դատավոր կոչվելու իրավունք չունի, այս մասին այսօր լրագրողների հետ զրույցում ասաց «Քաղաքացիական գիտակցություն» ՀԿ ղեկավար Նարեկ Սամսոնյանը՝ խոսելով «Ադեկվադ» միաբանության անդամ Արթուր Դանիելյանի և ԱԺ փոխնախագահ Ալեն Սիմոնյանի միջև տեղի ունեցած ծեծկռտուքի գործով դատական նիստի մասին:

Նարեկ Սամսոնյանը նշեց, որ այս գործը բոլոր առումներով աբսուրդի ժանրից է, ապա հավելեց, որ չի հավատում, որ «գործն այս կեղտոտ իշխանությունների առկայության դեպքում արդար լուծում ստանա»:

«Հավատացնում եմ, որ մեղադրյալի ու տուժողի տեղերը միանգամից փոխվելու են իշխանափոխությունից հետո: Այս գործն ակունքն է բոլոր այն արատավոր երևույթների, որոնցից սկսել են արդեն իրենք բողոքել, սա հայհոյանքի սկզբնաղբյուրն է, սա բռնության կոչերով իշխանության գալու սկզբնաղբյուրն է: Նրանք եկան բռնության և ատելության քարոզով և հիմա նրանք գնում են այդ քարոզով: Ես հիմա այստեղ եմ, որ հավաստեմ՝ ես այս իշխանություններին ճանապարհելու միակ տարբերակն իրենց նման հայհոյելն ու սպառնալիքն է: Ողջունում եմ Արթուրի տված հայհոյանքն այդ կենդանուն»,-ասաց նա:

Նարեկ Սամսոնյանը նաև նշեց, որ այս իշխանության բոլոր ներկայացուցիչները նույն պատասխանն են ստանալու: «Դա իրենց բերածն է, իրենց արժեքներն են, և այդ արժեքներով էլ գնալու են, եթե ոչ ավելի վատ, եթե ոչ այդ բռնության և հայհոյանքների գործնական կիրառելիությամբ են գնալու, ապա գնալու են դրանց ուղեկցությամբ»,– ասաց նա:

Նշենք, որ այսօր այս գործով տեղի ունեցավ առաջին դատական նիստը, որը հետաձգվեց՝ մեղադրող կողմի չներկայանալու պատճառով: