«Ինձ համար որևէ անակնկալ չկար, որ Ալեն Սիմոնյանի վերաբերյալ գործը կկարճվի». Ա. Դանիելյանի գործով դատական առաջին նիստը հետաձգվեց (տեսանյութեր)

16։32

Ինձ զանգեցին դատավորի աշխատակազմից և ասացին, որ դատախազը դիմում է ներկայացրել՝ մեկ այլ գործով զբաղված լինելու պատճառով չի կարող ներկայանալ: Բոլորս էլ հասկանում ենք, որ այս գործով դա չի կարող լինել պատահականություն. դատարանի բակում լրագրողներ հետ զրույցում ասաց «Ադեկվադ» միաբանության ղեկավար Արթուր Դանիելյանի փաստաբան Տիգրան Աթանեսյանը: Փաստաբանը նշեց, որ տուժող կողմը չի ներկայացել նիստին: Աթանեսյանի խոսքով՝ Արթուր Դանիելյանն իրեն առաջադրված մեղադրանքը չի ընդունում։

15։47

Երևանի ընդհանուր իրավասության դատարանում մեկնարկել էր «Ադեկվադ» միաբանության ղեկավար Արթուր Դանիելյանի գործով դատական նիստը:

Նրան մեղադրանք է առաջադրված խուլիգանության հատկանիշներով՝ ՀՀ ՔՕ-ի 258-րդ հոդվածի 2-րդ մասի հատկանիշներով, որը սահմանում է՝ խուլիգանություն, որը զուգորդվել է անձի նկատմամբ բռնություն գործադրելով կամ դա գործադրելու սպառնալիքով:

Պատժվում է տուգանքով՝ նվազագույն աշխատավարձի հարյուրապատիկից երեքհարյուրապատիկի չափով, կամ կալանքով` մեկից երեք ամիս ժամկետով, կամ ազատազրկմամբ` առավելագույնը երկու տարի ժամկետով:

Ըստ մեղադրանքի համառոտ նկարագրի՝ Արթուր Դանիելյանին մեղադրանք է առաջադրվել այն բանի համար, որ նա դիտավորությամբ կոպիտ կերպով խախտելով հասարակական կարգը և բացահայտ անհարգալից վերաբերմունք դրսևորելով անձի նկատմամբ, կատարել է խուլիգանություն, որը զուգորդվել է անձի նկատմամբ բռնություն գործադրելով։

Արթուր Դանիելյանի նկատմամբ խափանման միջոց է ընտրված ստորագրություն չհեռանալու մասին:

«Ինձ համար որևէ անակնկալ չկար, որ Ալեն Սիմոնյանի վերաբերյալ գործը կկարճվի, անակնկալ չկար, որ, փաստորեն, ես եմ միջադեպի միակ և հնարավոր մեղավորը»։ Այս մասինն էլ Երևանի ընդհանուր իրավասության դատարանի մոտ լրագրողների հետ զրույցում ասաց «Ադեկվադ» միաբանության ղեկավար Արթուր Դանիելյանը, ում մեղադրանք է առաջադրված խուլիգանության հատկանիշներով՝ ՀՀ ՔՕ-ի 258-րդ հոդվածի 2-րդ մասի հատկանիշներով, որը սահմանում է՝ խուլիգանություն, որը զուգորդվել է անձի նկատմամբ բռնություն գործադրելով կամ դա գործադրելու սպառնալիքով:

«Ես ստիպված կլինեմ այս առիթն օգտագործել հանրությանն ինչ-որ օգուտ տալու համար, կգովազդեմ համաշխարհային մշակույթի կարևորագույն գործերից մեկը՝ «Եղջերուների որսորդը» ֆիլմը»,-հավելեց Դանիելյանը։

Նա նշեց՝ դատախազն այսօր հրաժարվել է ներկայանալ նիստին, և այն հետաձգվում է։ «Դեպքը տեղի է ունեցել ուղիղ մեկ տարի առաջ, առաջին նիստը պետք է տեղի ունենար մեկ տարի հետո, սակայն տեղի չի ունենա։ Չեմ պատկերացնում՝ երբ դատավարությունը տեղի կունենա։ Սա ինձ համար նույնպես անակնկալ չէ»,-ասաց Դանիելյանը՝ նշելով նաև, թե քաղաքական առումով այս ամենը շատ մեծ նշանակություն ունի։

«Մանավանդ վերջին կես տարվա ընթացքում իրենց ընդդիմադիր համարող գրեթե բոլոր քաղաքական գործիչները իրենց ելույթներում պնդում են, որ այս իշխանություններն ու նրանց կամակատարները պետք է րոպե առաջ հեռանան, նույնիսկ՝ սպանվեն, բայց, ի հեճուկս բոլոր այդ կոչերի, որևէ բան տեղի չի ունենում։ Ըստ էության, այս իշխանության ներկայացուցիչներից ընդամենը երկու հոգի են խնդիր ունեցել փողոցներում՝ մեկը՝ Ալեն Սիմոնյանը, մյուսը՝ Արարատ Միրզոյանը։ Իմ կարծիքով՝ ամենակարևոր հարցը, որ հանրությունն ինքն իրեն պետք է տա, հետևյալն է՝ որն է պատճառը, որ քաղաքական գործիչները անընդհատ հայտարարություններ են անում, բայց դրանք ոչ մեկը կյանքի չի կոչում»,-ասաց Դանիելյանը։

Նշենք, որ ըստ մեղադրանքի համառոտ նկարագրի՝ Արթուր Դանիելյանին մեղադրանք է առաջադրվել այն բանի համար, որ նա դիտավորությամբ կոպիտ կերպով խախտելով հասարակական կարգը և բացահայտ անհարգալից վերաբերմունք դրսևորելով անձի նկատմամբ, կատարել է խուլիգանություն, որը զուգորդվել է անձի նկատմամբ բռնություն գործադրելով։ Նրա նկատմամբ խափանման միջոց է ընտրված ստորագրություն չհեռանալու մասին:

Նշենք նաև, որ գործն առնչվում է ԱԺ փոխնախագահ Ալեն Սիմոնյանի հետ տեղի ունեցած միջադեպին, որի վերաբերյալ պարզաբանում էր տվել Ալեն Սիմոնյանը և հայտնել. «Ի պատասխան իմ հասցեին հնչեցված հայհոյանքին՝ գլխով ջարդել եմ Արթուր Դանիելյանի քիթը»: