Ֆրանսիացի պատգամավորն Ադրբեջանում պահվող հայ գերիների ազատ արձակման պահանջով նոր բանաձև է ներկայացրել խորհրդարան

Ֆրանսիայի Վալ դ'Ուազ դեպարտամենտից ընտրված պատգամավոր, նախկին սոցիալիստ Ֆրանսուա Պուպոնին նոր բանաձև է ներկայացրել երկրի խորհրդարան, որով կոչ է անում Ֆրանսիային պահանջել Ադրբեջանից վերադարձնել ռազմական գործողությունների հետևանքով գերեվարված ռազմագերիներին և քաղաքացիական անձանց, ինչպես նաև ՀՀ իշխանություններին փոխանցել զոհված հայ զինծառայողների աճյունները:

Այս մասին ֆրանսիացի պաշտոնյան տեղեկացրել է իր ֆեյսբուքյան պաշտոնական էջում:

«Ես բանաձևի միջնորդություն եմ ներկայացրել, որով կոչ է արվում անհապաղ ազատ արձակել հայ ռազմագերիներին: Արցախում Ադրբեջանի հետ հակամարտությունից հետո շատ հայ զինվորներ դեռ ձերբակալված են Ադրբեջանի իշխանությունների կողմից և սպասում են հայրենադարձությանը: Այս պրակտիկան բացարձակապես հակասում է Ժնևի կոնվենցիային և միջազգային իրավունքով սահմանված նորմերին: Ֆրանսիան պետք է Ադրբեջանին կոչ անի նրանց ազատ արձակել, դա է իմ բանաձևի իմաստը, և ես ուզում եմ շնորհակալություն հայտնել այն խորհրդարանականներին, որոնք համաձայնել են ստորագրել այն»,- շեշտել է պատգամավորը:

Ստորև ներկայացնում ենք բանաձևի տեքստը.

«1. Հաշվի առնելով 2020 թվականի սեպտեմբերի 27-ին Ադրբեջանի կողմից Լեռնային Ղարաբաղի դեմ հրահրված պատերազմում Թուրքիայի և ջիհադիստական զինյալների ռազմական աջակցությունը և հումանիտար իրավունքի խախտումները, որը հանգեցրել է հազարավոր մարդկանց մահվան կամ բռնի տեղահանման, ինչպես նաև պատերազմի ժամանակ քաղաքացիական անձանց պաշտպանության վերաբերյալ Ժնևի կոնվենցիան,

2. Հաշվի առնելով 2020 թվականի նոյեմբերի 9-ի հրադադարի մասին հայտարարությունը՝ կնքված Ադրբեջանի, Հայաստանի և Ռուսաստանի ղեկավարների միջև,

3. Հաշվի առնելով այն փաստը, որ սույն հայտարարության 8-րդ հոդվածը վերաբերում է ռազմագերիների փոխանակմանը, կալանավորված անձանձ կամ պատանդներին, ինչպես նաև մարտերում զոհված զինվորների աճյունների վերադարձին,

4. Հաշվի առնելով, որ Ժնևի երրորդ կոնվենցիան, որը ստորագրել են Ադրբեջանն ու Հայաստանը, և որով պահանջվում է ազատ արձակել ռազմագերիներին և ռազմական գործողությունների ավարտին ձերբակալված խաղաղ բնակիչներին, մարդասիրական վերաբերմունք ցուցաբերել գերության մեջ գտնվող անձանց նկատմամբ

5. Հաշվի առնելով այն, որ Ադրբեջանը, չնայած իր ստանձնած պարտավորություններին, խախտում է 2020 թվականի նոյեմբերի 9-ի հայտարարությունը, շարունակում է կալանավորած պահել ավելի քան 200 ռազմագերու և մի քանի քաղաքացիական անձանց, որոնց ընտանիքները Հայաստանում կամ Լեռնային Ղարաբաղում նրանց մասին տեղեկություններ չունեն,

6. Հաշվի առնելով այն, որ քաղաքացիական և ռազմական գերիներից մի քանիսը գերեվարվել են նոյեմբերի 9-ին մարտերի ավարտից հետո ադրբեջանական բանակի ռազմական արշավանքների ժամանակ, մասնավորապես, դեկտեմբերի 12-ին և 15-ին Լեռնային Ղարաբաղի Խծաբերդ և Հին Թաղեր գյուղերում՝ օգտվելով ռուս խաղաղապահների բացակայությունից,

7. Հաշվի առնելով, որ պատերազմի ընթացքում և դրանից հետո ադրբեջանական բանակի կողմից իրականացված և սոցիալական ցանցերում ցուցադրվող ամենօրյա վայրագությունները,

8. Հաշվի առնելով մարտական գործողություններում զոհված հայ զինծառայողների մարմինների վրա ադրբեջանական բանակի կողմից բազմիցս կատարված ստորացուցիչ խեղումները, ինչպես նաև այն հոգեբանական խոշտանգումները, որոնք հասցվել են այն ընտանիքներին, որոնք ավելի քան հինգ ամիս սպասում են իրենց հարազատների աճյունների վերադարձին,

9. Հաշվի առնելով, որ Հայաստանը կատարել է իր բոլոր պարտավորությունները՝ գերիների և ադրբեջանցի զինծառայողների մարմինների վերադարձի առնչությամբ,

10. Հաշվի առնելով, որ Ֆրանսիան Մինսկի խմբի համանախագահ է, որը ողջունել է Լեռնային Ղարաբաղում ռազմական գործողությունների դադարեցումը և կոչ է արել հարգել նոյեմբերի 9-ի հայտարարությունը,

Կոչ է արվում Ֆրանսիայի կառավարությանն առանց պատժամիջոցների կիրառման հստակ պահանջել Ադրբեջանից հարգել միջազգային պարտավորությունները, այն է՝ քաղաքացիական և ռազմական բանտարկյալների անհապաղ ազատումը և զոհված հայ զինվորների մարմինների անհապաղ վերադարձը»: