ԵԽԽՎ Մոնիթորինգի հանձնաժողովի տարածած վերնագիրն արդեն իսկ ԵԽԽՎ հայաստանյան պատվիրակության և խորհրդարանական դիվանագիտության լիակատար պարտությունն է. Նաիրա Կարապետյան
Երեկ ԵԽԽՎ Մոնիթորինգի հանձնաժողովը հայտարարություն տարածեց Արցախյան հակամարտության մասին: Հայտարարությունը անդրադառնում է հայ ռազմագերիների խնդրին, մշակութային ժառանգության պահպանմանը, ականապատ տարածքներին և հետպատերազմյա այլ խնդիրներին:
«Մոնիթորինգի հանձնաժողովի տարածած հայտարարության վերնագիրն արդեն իսկ ԵԽԽՎ մեր պատվիրակության և խորհրդարանական դիվանագիտության լիակատար պարտությունն է՝ «Հայաստանի և Ադրբեջանի միջև հակամարտության վերաբերյալ Մոնիթորինգի հանձնաժողովի հայտարարություն» (Statement by the Monitoring Committee on the conflict between Armenia and Azerbaijan): Հայաստանի և Ադրբեջանի միջև հակամարտություն: Այստեղ այլևս չկա Արցախի Հանրապետություն, չկա Արցախի Հանրապետության կարգավիճակի հարց, չկա ազգերի ինքնորոշման իրավունք, փոխարենը՝ երկու պետությունների միջև կա տարածքային վեճ», - մեզ հետ զրույցում նշեց «Եվրոպական ինտեգրացիա» ՀԿ նախագահ Նաիրա Կարապետյանը:
Նա ընդգծել է, որ սա տարիներ շարունակ Ադրբեջանի վարած գծի ամրագրումն է, ինչը և իր հաստատումը ստացավ թեկուզ այն փաստից, որ նոյեմբերի 9-ին պատերազմական գործողությունները դադարեցնելու մասին հայրարարությունը ստորագրեց հենց Հայաստանի վարչապետը: «Մի հայտարարություն, որով նա պարտավորվում էր «վերադարձնել» Ադրբեջանին տարածքներ, որոնց չէր տիրապետում, նա այդ լիազորությունը չուներ»,- ասել է նա:
Կարապետյանն ընդգծել է, որ Մոնիթորինգի հանձնաժողովի հայտարարությունն իր մեջ ներառում է Հայաստանի ու Արցախի համար մի շարք վտանգավոր կետեր:
«Հանձնաժողովը, օրինակ, հակամարտությունների հարցով ենթահանձնաժողովին հանձնարարում է մեխանիզմներ մտածել պատերազմի ընթացքում մարդու իրավունքների խախտման դեպքերի ուսումնասիրման համար: Այսպիսի պլատֆորմը մեզ հնարավորություն է տալու ընդամենը բարձրաձայնել այն ամենի մասին, ինչ արել է Ադրբեջանը, սակայն պետք է հաշվի առնել, որ Ադրբեջանն իր հերթին բոցաշունչ «օրինակներ» է բերելու մեր կողմից արված «անմարդկային խախտումների»: Միայն բեմադրված չպայթած «Սմերչները» երևի հերիք են՝ բնակելի տան անվնաս սեղանի մեջ, Գյանջայի մաքուր ասֆալտին մխրճված և այլն»,- նշել է նա:
Նաիրա Կարապետյանն ընդգծել է, որ հայտարարության մեջ կա անդրադարձ նաև մշակութային ժառանգության պահպանման անհրաժեշտությանը, և բնական է, որ վերը նշված վարքագիծն Ադրբեջանը դրսևորելու է նաև այս հարցում:
«Բավական է նայել Ալիևի և իր վարչախմբի ելույթները մեր պատմական վայրերի մասին, որպեսզի հասկանանք, թե ինչ է մեզ սպասվում: Ես վստահ եմ, որ այս հարթակը ստեղծելու է աղմուկ, և ոչ՝ օգուտ», - նշել է մեր զրուցակիցը և հավելել՝ գովելի է, որ հայտարարությամբ ԵԽԽՎ Մոնիթորինգի հանձնաժողովը կոչ է անում Ադրբեջանին անհապաղ հայրենիք վերադարձնել ռազմագերիներին` անկախ նրանց տրված բնորոշումից. «Այստեղ նաև նշվում է ականապատ տարածքների քարտեզների տրամադրման խնդիրը, ինչի մասին անհասկանալի կերպով լռում են մեր իշխանությունները: Միակ համեմատաբար դրական կետը Մոնիթորինգի հանձնաժողովի հայտարարության մեջ Մինսկի խմբի ձևաչափով խաղաղ բանակցություններ սկսելու կոչն էր», - եզրափակել է Կարապետյանը: