ԱԱԾ տնօրենը գրություն է ուղարկել ՔԿ նախագահին՝ նշելով՝ Մեղրիով Ադրբեջանին ուղիներ տրամադրելու հարցը լուրջ մտահոգություն է առաջացրել տարածաշրջանի բնակչության շրջանում. Լուսինե Սահակյան

ԱԱԾ-ի տնօրեն Արմեն Աբազյանի գրությունը նախաքննական նյութերում է և երևում է՝ Մեղրիի բնակիչները իրենց բողոքի ձայնն են բարձրացրել և ակցիա են իրականացրել Նիկոլ Փաշինյանի դեմ: Այս մասին Tert.am-ի հետ զրույցում տեղեկացրեց փաստաբան Լուսինե Սահակյանը, ով իր ֆեյսբուքյան էջում հրապարակում է արել, որտեղ հրապարակված է ԱԱԾ տնօրենի գրությունը ՀՀ քննչական կոմիտեի նախագահ Հայկ Գրիգորյանին, որտեղ նշվում է՝ ողջ Մեղրիի բնակչությունը մտահոգված է նոյեմբերի 9-ի համաձայնագրով:

«Հստակ երևում է՝ ԱԱԾ-ն նշել է, որ Մեղրիի ողջ բնակչությունը անհանգստացած է Մեղրիի տարածքով Ադրբեջանին ուղիներ տրամադրելու հարցով և մեծ մասը մեղադրում է Նիկոլ Փաշինյանին, մինչ դեռ Փաշինյանը այս ամենը գիտակցելով՝ հայտնվել էր Մեղրիում և անհասկանալի է՝ ինչ գործողությունների էր սպասում»,- ասաց Լուսինե Սահակյանը:

Փաստաբանը մեկնաբանեց Նիկոլ Փաշինյանի հայտարարությունները առ այն, որ գործողությունները եղել են ուղղորդված, մի խմբակ անձիք էին այնտեղ, որոնք ընդամենը տպավորություն էին ուզում ստեղծել, և գործող իշխանությունը առաջ է տարել այդ թեզը, փորձել շրջանառել մամուլում:

«ԱԱԾ տնօրենի գրության մեջ, որը ուղղված է Քննչական կոմիտեի նախագահին, հստակ նշվում է՝ ողջ ազգաբնակչությունն է այս խնդրով մտահոգված, և նրանց մեծ մասը մեղադրում է գործող վարչապետին, սա պատասխանն է Նիկոլ Փաշինյանի հայտարարություններին, որ Սյունիքում կատարվածը եղել է ուղղորդված շարժում»,- նշեց փաստաբանը:

Նաև իր խոսքում նշեց՝ սյունեցիների ձերբակալումը հետապնդում է մեկ նպատակ՝ վախի մթնոլորտ սերմանել բազմաթիվ անձանց շրջանակներում, ովքեր իրենց անհամաձայնությունն են հայտնել և իր դեմ բողոքի ակցիաներ են կազմակերպել, այդ մարդկանց փորձել ազատությունից զրկել ընտրություններից առաջ:

«Այս գրությունը նաև էական է նրանով, որ մարդկանցմեղադրում են խուլիգանության մեջ, մենք հստակ գիտենք՝ խուլիգանությունը պետք է կոնկրետ հանրությանը ուղղված լինի, բայց այդ բողոքի ակցիան կոնկրետ նպատակ է ունեցել և դա ուղղված է եղել Նիկոլ Փաշինյանին և հետևաբար նման հանցակազմ գոյություն ունենալ չի կարող»,- ասաց Լուսինե Սահակյանը:

Հիշեցնենք՝ օրեր առաջ ՀՀ վարչապետ Նիկոլ Փաշինյանը այցելություն է ունեցել Սյունիքի մարզ, որտեղի բնակիչները բողոքի ակցիա են իրականացրել: Այցելությունից ժամեր անց ձերբակալվել են ակցիա իրականացնող սյունեցիները և Սյունիքի մարզի համայնքապետարանի ղեկավար կազմից անձինք, որոնց մեղադրանք է առաջադրվել խուլիգանություն հանցակազմով: