Փաշինյանը չի ասում՝ ինչ դիրքորոշում ունի, տպավորություն է, որ, որպես պարտված կողմ, ընդունել է խաղի կանոնները․ բանակցային գործի մասնագետը՝ եռակողմ համաձայնագրի իրականացման մասին (տեսանյութ)
Հայտնի է, թե արցախյան պատերազմի ավարտից հետո ինչ են ասել նոյեմբերի 9-ին ստորագրված եռակողմ համաձայնագրի մասնակիցները, բայց չգիտենք, թե արդյոք եղել են նաև բանավոր պայմանավորվածություններ, և թե արդյոք բանակցությունները շարունակվում են։
Tert.am-ի հետ զրույցում նման դիտարկում արեց բանակցային գործի մասնագետ (CMPartners, Քեմբրիջ, ԱՄՆ) Արթուր Մարտիրոսյանը՝ անդրադառնալով համաձայնագրի ստորագրումից հետո ստեղծված իրավիճակին։
«Ըստ երևույթին, բանակցությունները շարունակվում են փակ խողովակներով, որովհետև, համաձայնագրի բոլոր կետերը չեն, որ իրականացվել են։ Եթե դրանք դիտարկենք, կտեսնենք, որ օրինակ՝ գերիների փոխանակման մասին կետը դեռևս չի իրականացվել, և ադրբեջանական կողմը գտել է հնարավորություն՝ չիրականացնել այդ կետը և պահանջել, որ այլ կետ իրականացվի, այսինքն՝ որ ստանա Մեղրիի միջանցք և այլն։ Հայկական կողմն էլ պնդում է, որ պետք է բացվեն բոլոր կոմունիկացիները»,- ասաց նա՝ նկատելով, որ կողմերը համաձայնության չեն գալիս հիմա։
Ադրբեջանական կողմն, ըստ մասնագետի, պատանդներին որպես լծակ է պահում իր ձեռքում, որ իրականացվեն իր պահանջները, ասում է, որ եթե, օրինակ՝ միջանցքը չբացենք, ապա նա գերիներին չի վերադարձնի, եթե պետք լինի, նաև ուժով կարող է լուծել Զանգեզուրի հարցը։
«Արտաքին գործերի նախարարությունը ինչ-որ հայտարարություն արեց, բայց մենք ոչինչ չենք լսում պարոն Փաշինյանի շուրթերից։ Այսինքն՝ ինքը չի մեկնաբանում, չի ասում՝ ինչ դիրքորոշում ունի, ինչ է լինելու։ Այնպիսի տպավորություն է, որ ինքը, որպես պարտված կողմ, ընդունել է խաղի կանոնները, և դրանք հետևյալն են, որ ռուսական կողմն ունի հստակ շահեր այս տարածաշրջանում և չի ցանկանում ներգրավված տեսնել այստեղ ԱՄՆ-ին, ընդհանրապես Արևմուտքը, այդ պատճառով երկու կողմին էլ ասել է՝ «մենք՝ երեքս, Թուրքիան, Իրանը, գուցե որոշ ժամանակ անց նաև Վրաստանը միանա, պետք է զբաղվենք մեր տարածաշրջանային խնդիրներով, որովհետև այստեղ մենք ունենք սահմաններ և ըստ այդմ՝ նաև շահեր»,- ասաց նա։
Մանրամասները տեսանյութում։