Մյանմարի զինվորականները հայտարարել են երկրում բողոքի ակցիաների ընթացքում 258 մարդու մահվան մասին
Մյանմարում փետրվարի սկզբից բողոքի ակցիաների հետևանքով 258 մարդ է զոհվել: Այս մասին «ՌԻԱ Նովոստի»-ին տված հարցազրույցում ասել է ռազմական իշխանությունների պաշտոնական ներկայացուցիչ գեներալ Զո Մին Տունը:
Մյանմարի քաղբանտարկյալների օգնության ասոցիացիան, որը փետրվարի սկզբին բանակի իշխանության գալուց ի վեր վարում է ցուցարարների շրջանում զոհերի վիճակագրությունը, տեղեկացնում է, որ երկրում բախումների հետևանքով 728 մարդ է զոհվել: ՄԱԿ-ի գնահատականով`Մյանմարի ճգնաժամի սկզբից ի վեր 741 մարդ է մահացել, այդ թվում` 52 երեխա:
«Երբ բողոքի ակցիան տեղափոխվել էր ահաբեկչության փուլ, իհարկե, մեր իրավապահ մարմինները ստիպված էին զենք օգտագործել: Հետևաբար կան զոհեր: Ես հիմա կնշեմ նրանց պաշտոնական թիվը: Մինչև այսօր բողոքի ցույցերի հետ կապված մահվան ընդհանուր թիվը կազմում է 258 մարդ: Դրանցից 240 մարդ մահացել է իրավապահ ուժերի պատասխան կրակոցներից՝ նրանց վրա զենքով հարձակվելուց հետո: Ստիպված էինք ուժ կիրառել ամբոխին զինաթափելու համար»,-ասել է Զո Մին Տունը:
Նա պարզաբանել է, որ ևս 7 մարդ մահացել է, քանի որ խանգարել է ոստիկանությանը քանդել փողոցներում տեղադրված բարիկադները: Ցուցարարների շրջանում զանգվածային ծեծկռտուքի հետևանքով մահացել է 1 մարդ, ևս 5-ը մահացել է բողոքների ընթացքում սրտի կաթվածի պատճառով:
Հիշեցնենք, որ Մյանմարում տեղի է ունեցել ռազմական հեղաշրջում, որի ընթացքում զինվորականները ձերբակալել են «Ազգային լիգա հանուն ժողովրդավարության» կուսակցության ղեկավար և պետական խորհրդական Աուն Սան Սու Չժիին, նախագահ Վին Մյինային և այլ բարձրաստիճան պաշտոնյաների: Զինվորական հեռուստատեսությունը հաղորդել էր երկրում մեկ տարի ժամկետով արտակարգ դրություն հայտարարելու մասին: Պետական հեղաշրջման արդյունքում պետական իշխանությունը երկրում անցել է Մյանմարի զինված ուժերի գլխավոր հրամանատար Մին Աունգ Խլայնուի ձեռքը, իսկ նախագահի պաշտոնակատար է դարձել փոխնախագահ Մյինգ Շվեն: