Շվեյցարական Ալպերում մոլորված կատուն լեռնագնացների հետ 3 անգամ բարձրացել է ավելի քան 3000 մ բարձրությամբ լեռան գագաթը (լուսանկարներ, տեսանյութ)
Շվեյցարիայում տնից փախած կատուն լեռնագնացներին ուղեկցել է մինչև լեռան գագաթ, հայտնում է բրիտանական Daily Mail պարբերականը։
Սիրիլ և Էրիկ Ռոհրերները բարձրացել են Ալպերում գտնվող Բրիսթեն լեռը։ Առավոտյան ժամը 4-ի կողմերը, երբ հատել էին ճանապարհի գրեթե կեսը, կատվի ձայն են լսել։
«Նա վախեցած տեսք ուներ և չէր հասկանում, թե ինչ է կատարվում», - ասել է Սիրիլը:
Կատուն Ռոհրերների հետ բարձրացել է լեռան գագաթը, որը գտնվում է ծովի մակարդակից 3073 մ բարձրության վրա: Վերելքի սկզբից նա ստիպված էր քայլել մոտ 2.3 կիլոմետր:
«Նա դողում էր ցրտից, իսկ ոտքերը ձնից արնահոսում էին: Երբ նա շատ էր հոգնել ինքնուրույն քայլելու համար, մենք վերցրինք նրան մեր գիրկն ու տարանք: Շփոթված էինք և շատ ցավում էինք կատվի համար», - նշել է Սիրիլը:
Ավելի ուշ լեռնագնացները իմացել են, որ կատուն փախել էր տնից և 4 օրվա մեջ արդեն 3-րդ անգամն էր, որ զբոսաշրջիկների հետ գագաթն էր բարձրանում։ Արդյունքում լեռնագնացների մեկ այլ խումբ կատվին իջեցրել է գագաթից և վերադաձրել տուն։
«Կենդանիները տարօրինակ բաներ են անում: Նրանք շատ ավելի ուժեղ են, քան մարդիկ: Նրանք երբեք չեն հանձնվում», - ասել է լեռնագնացը: