Թունաքիմիկատների գերեզմանոցը տեղափոխելու համար 5 մլն եվրո է եկել, բայց 400 000 եվրոն արդեն ծախսվել է. 5 տարի հետո գումարից ոչինչ չի մնա, իսկ թունաքիմիկատը կթունավորի քաղաքը. ավագանու անդամ
Երկու օր առաջ նորից այցելել եմ Էրեբունի վարչական շրջանի 4-րդ զանգվածի թունաքիմիկատների գերեզմանոց և նույն զգացողությունը ունեցա, ինչ ունեցել եմ երկու տարի առաջ: Իմ և իմ ընկերոջ մարմինը քոր էր գալիս, մեր ինքնազգացողությունը վատ էր: Երկու տարի խոսում եմ թունաքիմիկատների գերեզմանոցի մասին. ավագանու նիստին նշեց ԲՀԿ խմբակցության անդամ Արմեն Ներսիսյանը:
Նրա խոսքով՝ ԴՏՏ թունաքիմիկատը վտանգավոր է՝ առաջացնում է ուռուցք և այլ հիվանդություններ.
«Հինգ մլն եվրո փող է եկել այդ թունաքիմիկատների գերեզմանոցը տեղափոխելու կամ ոչնչացնելու համար, բայց երկու տարի լսում եմ, որ մոտ 400 հազար եվրո արդեն այդ գումարից ծախսվել է փորձարկումների և լաբորատոր աշխատանքների համար: Հինգ տարի հետո այդ 5 մլն-ից ոչինչ չի մնա և այդ թունաքիմիկիատ «ԴՏՏ» կոչեցյալը կթունավորի Երևան քաղաքը, գետերը, Հայաստանը»:
Արմեն Ներսիսյանն իր գործընկերներին կոչ արեց միասին գնալ և տարածքը տեսնել:
«Ես մտահոգված եմ մեր քաղաքացիների առողջության համար: Սա լուրջ հարց է այդ փողը կամաց-կամաց մաշվում է, եկեք հասկանանք՝ ինչի՞ վրա են այդ գումարները ծախսվել և հասկանանք՝ ե՞րբ են ոչնչացնելու այս թունաքիմիկատը, և այս գլխացավանքից մենք կազատվենք: Անձրևաջրերը, ձնհալի ջրերը, փոքր առվակներով գալիս լցվում են գետառ, որտեղից գնում են և ոռոգում մեր դաշտերը, պատկերացնո՞ւմ եք՝ ինչ է կատարվում: Ուշադրություն դարձրեք այս խնդրին, ծայրահեղ ծանր իրավիճակ է: Պատերազմից, կորոնավիորւսից այսքան մարդիկ մահացան, հիմա էլ այս թունաքիմիկիատից են միգուցե մարդիկ մահանում, և մենք տեղյակ չենք: Պարո՛ն քաղաքապետ, եկեք միասին գնանք, ես տեղը գիտեմ, կարող եմ ուղեկցել, և այս ամեն ինչի մասին դուք տեղյակ լինեք»,- նշեց Ներսիսյանը:
Քաղաքապետ Հայկ Մարությանը, անդրադառնալով խնդրին, տեղեկացրեց, որ Եվրամիության ծրագիրն առնչվում է կենցաղային վտանգավոր թափոններին միայն, իսկ դա կենցաղային թափոն չէ: Նա ընդգծեց, որ ծրագիրը ղեկավարվում է Եվրամիության միջոցով և ծախսերի վերաբերյալ թափանցիկ պրոցես է ընթանում, և կարող են դիմել և ստանալ ծախսերի ցուցակը.
«Ձեր նշած թափոնների մասով, կարծում եմ, այլ գերատեսչություն պետք է աշխատի, դա մեր ոլորտը չէ, բայց կփորձեմ Եվրամիության այդ ծրագրի կենցաղային վտանգավոր թափոններով զբաղվող փորձագետներին ներգրավել, բայց դա ծրագրից դուրս է, կարող են համաձայնել, կարող են չհամաձայնել»: