Ինչո՞ւ է Բրազիլիայում համավարակի զոհերի թիվը բարձր երեխաների շրջանում. BBC (լուսանկարներ)

Կորոնավիրուսային համավարակի մեկնարկից ի վեր՝ Բրազիլիայում օր-օրի ավելի շատ երեխաներ են մահանում հիվանդության պատճառով առաջացած կողմնակի բարդությունների հետևանքով: Տարածված թյուր կարծիք կա, որ կորոնավիրուսով վարակվելու դեպքում երեխաները ռիսկային գոտում չեն գտնվում, և հիվանդությունը նրանց մոտ թեթև ընթացք ունի:

Այս մասին գրում է BBC-ն, նշելով՝ իրականում այդ տեղեկատվությունն իրականությանը չի համապատասխանում, քանի որ հիվանդությունը տարբեր ընթացք է ունենում երեխաների համար:

Ըստ պաշտոնական տվյալների՝ 2020 թվականի մարտից մինչև 2021 թվականի փետրվարն ընկած ժամանակահատվածում Բրազիլիայում կորոնավիրուսի պատճառով մահացել է նվազագույնը 852 երեխա, որից 518-ը՝ մինչև 1 տարեկան: Այնուամենայնիվ, առողջապահական ոլորտի փորձագետները նշում են, որ իրական թիվը ավելի մոտ է 2000-ին:

Մասնագետների կարծիքով՝ երեխաների մահը հիմնականում պայմանավորված է մի քանի պատճառներով: Բրազիլիայում կորոնավիրուսի դեպքերի հսկայական քանակության պատճառով շատ երեխաներ չեն թեստավորվում, որի հետևանքով էլ նրանց մոտ չի հաստատվում COVID-19-ի առկայությունը: Հենց սա էլ մեծ մասամբ երեխաների մահացության պատճառ է դառնում, քանի որ հիվանդությունը հնարավոր է բուժել դրա առկայության մասին իմանալուց և համապատասխան միջոցների ձեռնարկելուց հետո: Բացի այդ, ինչքան շուտ է հայտնաբերվում վիրուսը, այնքան ավելի մեծ է բուժման հավանականությունը:

Հաճախ երեխաների մահացության պատճառ դառնում է ոչ թե հենց կորոնավիրուսը, այլ դրա պատճառով առաջացած կողմնակի բարդությունները: Բրազիլիայում երեխաների մեծ մասի մոտ զարգանում է շնչառական համախտանիշ՝ թոքաբորբ, սրտի հետ կապված խնդիրներ, ինչպես նաև ալերգիա: Հենց այս պատճառով նրանք կարիք են ունենում իմունոգլոբին հակամարմնի, որը բավականին թանկ արժե:

Ինչ վերաբերում է պատվաստանյութերին, սա ևս մեծ խնդիր է: Ներկայում մշակված պատվաստանյութերը նախատեսված են չափահաս մարդկանց համար, և չեն կարող օգտագործվել 16 տարեկանից ցածր երեխաների համար: