Ո՞ւմ էին ուղղված ծափահարությունները՝ Արցախի 70%-ի կորսմանը, թե որ զինվորները տոպրակներով ծածկված վրաններում են քնում, թե որ ներդրումներ չկան Հայաստանում ու տնտեսական գահավիժում է. Թագուհի Թովմասյան

Ես իսկապես չկասկացա, թե ում էին ուղղված այս ծափահարությունները՝ մեր կորցրած հողերի՞ն, երկրի գահավիժմա՞նը, թե առաջնագծերի բացակայությանը: Այս մասին լրագրողների հետ զրույցում ասաց անկախ պատգամավոր Թագուհի Թովմասյանը՝ անդրադառնալով երեկ ԱԺ-ում ծափահարություններին Նիկոլ Փաշինյանի հայտարարությունից հետո, որ Արցախում կա ապագա:

«Ու՞մ էին ուղղված ծափահարությունները, 70 տոկոս կորսված Արցախի՞ն, թե այն սահմաններին, որ հիմա կան Հայաստանում, Սյունիքում, Գեղարքունիքում, որ մենք չունենք առաջնագիծ, չունենք խրամատ, մեր զինվորները քնում են ցելոֆաններով փակված վրաններում։ Սրա՞ն էին ծափ տալիս, թե որ ներդրումներ չկան Հայաստանում, ծափ էին տալիս, որ գահավիժո՞ւմ ենք տնտեսապես ու մյուս բոլոր ոլորտներում»,- ասաց Թագուհի Թովմասյանը։

Պատգամավորը նաև անդրադարձավ Նիկոլ Փաշինյանի երեկվա հայտարարությանը, թե իրականության հետ որևէ աղերս չունի ԳՇ նախկին պետ Օնիկ Գասպարյանի` նոյեմբերի 17-ի հայտարարությունը, որ անհրաժեշտ է 2-3 օրվա ընթացքում պատերազմը կանգնեցնել։

«Մենք գիտեինք չէ՞, որ մենք պատերազմում ենք ոչ միայն Ադրբեջանի, այլ նաև Թուրքիայի գերպրոֆեսիոնալ բանակի հետ և որևէ մեկի մտքով անցնո՞ւմ էր, որ մենք կարող ենք ՆԱՏՕ-ի բանակին հաղթել, այսինքն՝ մենք այդքան լավատե՞ս էինք, նույնիսկ, եթե ահազանգ չէր հնչեցվել պատերազմի դադարեցման մասին, ապա գոնե պետք էր մտածել դրա մասին»,- նշեց պատգամավորը:

Նա նաև ընդգծեց՝ քառօրյա պատերազմի ռազմավարությունը դաս չի եղել ներկա իշխանությունների համար, երբ պատերազմը կանգնեցվեց՝ մի բարձունք կորցնելով:

«Քառօրյան մեզ պետք է դաս լիներ, քաղաքական իշխանությունը, որին բոլորս քննադատում էինք, և գոնե ես համարել եմ հողերը հանձնող, այնուամենայնիվ, հասկացավ պահի լրջությունը և ամեն գնով կանգնեցրեց պատերազմը և կանգնեցրեց «Լելե Թեփեի» կորստով, և մենք քննադատում էինք դա, բայց երբ հետ ենք նայում հասկանում ենք՝ գուցե ճիշտը դա էր»,- նշեց նա:

Թագուհի Թովմասյանը նաև նշեց, թե Գոռ Գևորգյանի հարցին չպատասխանելը և Նիկոլ Փաշինյանի ագրեսիվ արձագանքն ուղղված էին «Իմ քայլը» խմբակցության պատգամավորներին:

«Ես կարծում եմ՝ երեկվա Գոռ Գևորգյանի հարցին չպատասխանելու ագրեսիան ուղղված էր ավելի շատ «Իմ քայլի» պատգամավորներին, որովհետև ես կարծում եմ՝ ներսում կա մտավախություն, որ հնարավոր է, որ ևս մեկը որոշել է դուրս գալ խմբակցությունից և հիմա խնդիր կա որևէ մեկին ապացուցելու, որ եթե դու ևս դուրս գաս ու նստած լինես Գոռ Գևորգյանի կողքին, քեզ սպասվում է այս ապագան»,- ասաց Թագուհի Թովմասյանը: