2018թ. ամռանը Լևոն Տեր-Պետրոսյանի հետ հանդիպմանը նա ասաց. «հողերը արդեն պետք է տաս». Փաշինյան
Եթե մենք իշխանությունը պահելու մոլուցքով առաջնորդվեինք, դեռեւս 2020-ի դեկտեմբերին չէինք առաջարկի անցկացնել արտահերթ խորհրդարանական ընտրություններ: Այս մասին ԱԺ-ում կառավարության ծրագրի 2020 թվականի կատարման ընթացքի եւ արդյունքների մասին զեկույցը ներկայացնելիս նշեց ՀՀ վարչապետ Նիկոլ Փաշինյանը:
«Եթե այդպես լիներ, մենք հիմա էլ չէինք նախաձեռնի արտահերթ ընտրություններ, իհարկե, նաեւ խորհրդարանական ուժերի եւ ՀՀ նախագահի հետ ունեցած համատեղ որոշումների արդյունքում: Մենք ոչ թե մոլուցքով, ոչ թե սեփական, այլ ժողովրդի իշխանությունն ենք պահում, որովհետեւ այն ժողովրդին վերադարձնելու պարտավորություն ունենք»,-ասաց նա:
Վարչապետն անդրադարձավ նաև ԼՀԿ խմբակցության պտգամավոր Աննա Կոստանյանի հարցին՝ «եթե պնդում եք, որ բանակցային գործընթացում սխալներ թույլ չեք տվել, ինչո՞ւ է առաջին նախագահ Լեւոն Տեր-Պետրոսյանը հայտարարել, որ դուք ազգակործան պատուհաս եք»:
Ի պատասխան վարչապետն ասաց. «Առաջին նախագահն ունի Ղարաբաղի հարցի վերաբերյալ իր պատկերացումը, որը մեզ հայտնի է 1997-ին «Պատերազմ, թե խաղաղություն. Լրջանալու պահը» հոդվածով: 1996 թվականի նախագահական ընտրություններին առաջին նախագահը մասնակցել է «հաղթանակ, կայունություն, առաջընթաց» կարգախոսով, եւ այդ ժամանակ խոսք չի եղել խաղաղության, լրջանալու պահի մասին: Հետո այդ օրակարգը ձեւակերպվել է 1996-ի նախագահական ձախողված ընտրությունների ժամանակակից բառապաշարով ասած՝ «exit strategy»: Ես դեռ 2016-ի ամռանը Խորենացի փողոցում իմ ելույթում եմ ասել, որ առնվազն 2016-ին նա Սերժ Սարգսյանին ուղեկցել է բանակցային գործընթացում:
Դուք գիտեք, որ 2018-ի ամռանը առաջին նախագահի հետ հանդիպում է եղել, եւ կարող եմ գաղտնիք բացել, թե ինչ է ասել ինձ: Ասել է՝ «Հողերը արդեն պետք է տաս»; իսկ ինչի՞ դիմաց, ինչի՞ համար, ինչպե՞ս: Առաջին նախագահի պատկերացումը այս շրջանակից դուրս չի եկել: Մնացածն արդեն գնահատման հարց է»: