Այսօր ԱԺ-ում Նիկոլը սուտ էր խոսում «Լելե Թեփե»-ի մասին. ձեռքերը լվացած, ուրիշի վրա է մեղքը բարդում. Գեղամ Մանուկյան

Այսօր ուղղակի որպես քաղաքացի գրառում եմ արել, այս իշխանությունն այնքան է վախենում ամեն մի քաղաքացուց, որ Ոստիկանությունը բերել, լցրել է այստեղ, որովհետև հասկանում է՝ հոգեկան խանգարված մարդու նկատմամբ ժողովրդի վերաբերմունքն ինչպիսին է։ Այս մասին, այսօր՝ ապրիլի 14-ին, ԱԺ-ի մոտ լրագրողների հետ զրույցում ասաց ՀՅԴ անդամ, «Երկիր մեդիա» ՀԸ քաղաքական և լրատվության բաժնի ղեկավար Գեղամ Մանուկյանը՝ անդրադառնալով իր՝ ԱԺ մոտ գնալու վերաբերյալ գրառմանը։

Ըստ Մանուկյանի՝ ԱԺ-ում Նիկոլ Փաշինյանի ելույթներում գերակշռում է սուտը, այժմ էլ, սուտ խոսելու հետ Փաշինյանն սկսել է արդեն մեղքը բոլորի վրա բարդել։

«Այսօր արդեն ինքը բոլորովին մեղավոր չի, Հայաստանում բոլորին մեղավոր է հռչակում, վաղը չզարմանաք, որ զոհվածներին մեղավոր հռչակի, միայն թե իր դավաճանությունը, իր կառավարման արդյունքում պատերազմի պարտությունն իրենից հեռու տանի։

Դեռ շիրիմների վրա ծաղիկները չեն չորացել, ինքը խոսում է արդեն լուսավոր ապագայի մասին: Մարդը, որ կործանման է տարել մի ամբողջ երկիր, բանակ, ամեն ինչ, խաբեության նոր փուլն է սկսում: Նա մնալու է իր պարտված անցյալում, ժողովուրդը տրորելու է նրան այդ անցյալի մեջ»,-ասաց Գեղամ Մանուկյանը:

Նա անդրադարձավ «Լելե Թեփեի» օպերացիային՝ նշելով. «Այսօր ԱԺ-ում Նիկոլը սուտ էր խոսում «Լելե Թեփե»-ի մասին։ Այսօր ձեռքերը լվացած, ուրիշի վրա է մեղքը բարդում: Իր կինն է այդ օրը եղել Արցախի նախագահականում, ինքն ու կինն են առանձին սենյակից դուրս եկել, Արայիկ Հարությունյանն ու Արարատ Միրզոյանն էլ գլուխները կախ սպասել են, թե ինչ են ամուսիններով խոսելու, դուրս գան: Այդ օրն է ինքը հարցազրույց տվել RBK-ին՝ խոսելով այդ օպերացիայի մասին: Այդ բոլորը մի օր իր աչքը կկոխվի, շատ այլ փաստերի հետ»:

Նա նշեց՝ իմքայլական Հովիկ Աղազարյանն ԱԺ-ում խոսել է «ազգ-բանակ» սկզբունքի մասին․ «Նրա կողքին նստած պատգամավորների մեծ մասն ազգ-բանակ կոնցեպտի դեմ 2 տարի պայքար է մղել, ԱԽ քարտուղարը ծաղրել է այդ կոնցեպտը»,-նշեց Գեղամ Մանուկյանը։

Վերջինս հայտարարեց, որ այսօր, երբ իշխանությունը խոսում է ԱԺ արտահերթ ընտրությունների մասին, դա իշխանության բարի կամքի դրսևորումը չէ․ «Դա Հայրենիքի փրկության շարժման» անդադար պայքարի արդյունքն է, որ Նիկոլի փրկօղակներից մեկը դարձավ արտահերթ ընտրությունների թեզը, որ դրել է շրջանառության մեջ։ Չլիներ փողոցային պայքարը, ամբողջ երկրով քաղաքական պայքարը՝ այս իշխանության հեռացման համար, նա կնստեր, որեւէ արտահերթ ընտրությունների մասին չէր էլ մտածի»,-ասաց նա։