Անհեթեթություն է, թե ես եմ ասել՝ «Լելե Թեփեն» գրավեք․ առաջարկն արել է գեներալ, որոշումը կայացրել է գեներալ, կյանքի կոչելու հնարավորության գնահատումն իրականացրել է գեներալ․ Նիկոլ Փաշինյան
Ասում են՝ Սերժ Սարգսյանը «Լելե Թեփեն» հանձնել է, ես ասել եմ՝ գնացեք գրավեք, և այդ համատեքստում 700 զոհ է եղել, կատարյալ անհեթեթություն է։ Այս մասին ԱԺ-ում, Կառավարության ծրագրի կատարման ընթացքի և արդյունքների մասին 2020թ․ տարեկան զեկույցի ներկայացմանը հայտարարեց Նիկոլ Փաշինյանը՝ անդրադառնալով պատգամավոր Թագուհի Թովմասյանի՝ պատերազմի ընթացքում եղած թերությունների վերաբերյալ հարցին։
Պատգամավորը հարցրեց․ «Պատերազմի հնարավոր սկսման մասով Դուք խոսեցիք և հայտարարեցիք, որ, ըստ էության, դիվանագիտությունը եղել է փակուղում՝ մեջբերելով նախկին իշխանության գործունեության պայմաններում։ Ես կուզեի հետաքրքրվել պատերազմը վարելու մասին հնչած մեկնաբանություններից և թերություններից։ Մասնավորապես՝ բարձրաձայնվեց, որ Ձեր հրամանով է եղել զորակոչի դադարը այն պայմաններում, երբ միաժամանակ Դուք նաև մարտակոչով էիք հանդես գալիս։ Մարտունի 3, 7-րդ վաշտի զինվորների ծնողները բարձրաձայնել են պատերազմի կազմակերպչական մի շարք թերություններ, մասնավորապես, որ իրենց երեխաներին տարել են Հադրութ՝ այն հանձնելուց 2 օր անց»,-ասաց նա։
Փաշինյանն արձագանքեց՝ հայտարարությունն անհեթեթ է, և այդ հայտարարության հեղինակը մեծ խնդիր ունի։
«Խնդիրն այն է, որ երբ նա, բարձրաստիճան զինվորական լինելով, փորձում էր հանձնել 7-րդ պաշտպանական շրջանը, ես այս դահլիճում ներկա մի շարք մարդկանց ներկայությամբ կայացրել եմ որոշում, որի արդյունքում 7-րդ պաշտպանական շրջանը մինչև այսօր հայկական ԶՈւ-ի տրամադրության տակ է։ Պատերազմի ընթացքում դա ռազմականին մոտ միակ որոշումն է եղել, որը ես կայացրել եմ, և այդ մարդը, որը կիսահիստերիկ վիճակում անընդհատ օրումեջ հարցազրույց է տալիս և գեներալ-գնդապետի ուսադիրներով իր հիմնական օպոնենտ է համարում կնոջը, դուք գիտեք՝ ում կնոջը, այդ մարդը, ընդհանրապես, կարծում եմ՝ բազմաթիվ խնդիրներ և բազմաթիվ բարդույթներ ունի, և ինքը դեռ շատ հարցերի պետք է պատասխանի»,- ասաց նա, ապա հավելեց․
«Այդ մարդուն, իմիջիայլոց, արժե անվանել 7-րդ պաշտպանական շրջանի արծիվ, թե ոնց էր հազարի տակ ուզում փախնել ու բոլորին փախցնել այնտեղից, չնայած արծիվները չեն վազում, ջայլամներն են ավելի լավ վազում»,-ասաց նա՝ նշելով, թե պետք է լինի պատերազմի օբյեկտիվ քննություն։
Անդրադառնալով «Լելե Թեփե»-ին՝ Փաշինյանն ասաց․ «Այդ օպերացիայի առաջարկի հեղինակը եղել է գեներալ, այդ առաջարկն ընդունելի է համարել գեներալ, այդ առաջարկը կյանքի կոչելու հնարավորության գնահատումն իրականացրել է գեներալ, և որոշումը կայացրել է գեներալ, ընդ որում՝ այնպիսի գեներալներ, որոնք այդ պահին այդ որոշումն իրականացնելու հնարավորություն ունեցել են։ Այո, ես խոսակցության մի հատվածին ներկա եմ եղել, քննարկման մոդերացիա եմ արել և սեփական կարծիք ընդհանրապես չեմ հայտնել, և ամենաբարձրաստիճանին եմ հարցրել՝ ինչ կարծիքի ես, ասել է՝ լավ միտք է»,-ասաց նա։