Այս իշխանության համար հայրենիքը և տարածքը նույնն են․ նա նորից կեղծ հայրենասիրական խոսքեր կասի, բայց եթե այս անգամ էլ ժողովուրդը խաբվի, ապա պետություն, ապագա ունենալու իրավունք չունի․ Ս․ Ղարաբաղցյան

ՀՀ քաղաքական իշխանությունը հայրենասիրության հետ անգամ եզր չունի։ Նրա համար հայրենիքն ու տարածքը նույնն են։ Այս մասին Tert.am-ի հետ զրույցում ասաց գրող, հրապարակախոս Սպարտակ Ղարաբաղցյանը՝ անդրադառնալով ՀՀ ներքաղաքական վիճակին:

«Վստահ եմ՝ երբ սկսվի նախընտրական շրջանը, քաղաքական իշխանությունը նորից կեղծ հայրենասիրական հայտարարություններ է անելու, բայց եթե այս անգամ էլ ժողովուրդը խաբվի, ուրեմն՝ ժողովուրդն իրավունք չունի ո՛չ հայրենիք, ո՛չ պետություն, ո՛չ ապագա ունենալու։ Կարգախոսներով այսօր հայրենասիրություն չես մտցնի»,-ասաց հրապարակախոսը՝ նշելով, թե պատահական չէ, որ վերջին երեք տարվա ընթացքում անդունդ գոյացավ իրական ու կեղծ հայրենասերների միջև։

Ղարաբաղցյանը նշեց՝ ժողովուրդների, ազգի ամենամեծ զրահաբաճկոնը արժանապատվությունն է. «Հիմա ինչ զրահաբաճկոն էլ հագնեն այս քաղաքական իշխանությունները՝ իրենց լիդերի հետ, ամենամեծ զրահաբաճկոնն արդեն կորցրել են, էլ ոչինչ չի փրկի, բայց դա էլ ուղիղ համեմատական է այդ երկրում ապրող ժողովրդին»:

Ըստ Ղարաբաղցյանի՝ մենք ունենք խնդիր՝ քաղաքական իրավիճակը հանգուցալուծել, որից հետո միայն կարող ենք Հայաստան պետության ու հայ ազգի լուսավոր ապագայի մասին խոսել։ «Եթե մի փոքր բան էլ մնա այս վիճակից, վիրուսի նման է լինելու, իսկ հիվանդությունից պետք է մինչև վերջ բուժվել, եթե բուժումը չեղավ, վիրուսն արագորեն տարածվելու է։ Մենք մեզ նման շռայլություն թույլ տալ չենք կարող, մեր կորուստները շատ են։ Երեք տարում այսքան կորուստ ոչ մի պետություն, ոչ մի ազգ չի ունեցել, այն էլ նաև մշակույթի, բարոյականության, ազգային գաղափարախոսության իմաստով։ Դեռ կան խաբվածության փշրանքները, մարդիկ կան, որ չեն հասկանում՝ ինչ են կորցրել, իսկ դա շատ վտանգավոր է»,-նշեց նա՝ ընդգծելով, որ հիմա կորուստները գիտակցելու ժամանակն է եկել։

Հրապարակախոսի խոսքով՝ էական խնդիր է այն հանգամանքը, որ հասարակությունն է անտարբեր։ Վերջինս, ըստ Ղարաբաղցյանի, թմբիրից արթնանալու անհրաժեշտություն ունի, ինչի համար ուժեղ հարված է պետք։

«Այսօր ինքներս քաղաքական իշխանության թելադրանքով սկսել ենք խմբագրել մեր պատմությունը ու անկախ մեզանից դարձել ենք այդ հանցագործության մասնակիցները։ Եթե դու ինչ-որ բան չես անում, չի նշանակում՝ դու հանացագործ չես, ընդհակառակը՝ եթե տեսնում ես, բայց չես բռնում այդ ձեռքը, ավելի հանցագործ ես։ Այսօր միայն անտարբերության վերացմամբ կարող ենք վերադարձնել այն, ինչ կորցրել ենք և կորցնելու ճանապարհին ենք։ Մի երկրում, որտեղ մայրերից մեկն իր գերեվարված որդուն է սպասում, մյուսը հույսով որդուց մի մասունք է փնտրում, դու հանգիստ, անտարբեր չես կարող ապրել, դա բարոյական չէ»,-ասաց նա՝ նշելով, թե այսպես շարունակվելու դեպքում եղածն էլ պահպանել չենք կարողանա։

«Մենք աշխարհին փաստել ենք, որ արժանի ժողովուրդ ենք։ Ինչպես այսօրվա իշխանություններն արժանի չեն այս ժողովրդին, նույնն էլ մենք այս պահին արժանի չենք հզոր պետություն ունենալու։ Մենք մշակութային հետք ենք ունեցել, բայց հիմա լրիվ ուրիշ պատկեր ենք տեսնում։ Ազգայինը, մշակույթն ընդունում են բառի ձևով, մինչդեռ դա պրոցես է»,-նշեց նա։

Դիտարկմանը, թե այս փուլում, երբ պետականություն պահպանելու խնդիր կա, իշխանությունը խոսում է տարիներ շարունակ մեզ թշնամի համարած ու այժմ էլ թշնամի համարող պետությունների հետ բարեկամական հարաբերություններ զարգացնելու մասին, գրողն արձագանքեց, թե դա միֆ է, իսկ թշնամի երկրի հետ բարեկամական կապեր ունենալու մասին խոսելը ծիծաղելի է։

«Երբ քաղաքականության մեջ մարդիկ են, որ հայրենիքի զգացողություն չունեն, պետականության զգացողություն չունեն, բնական է, որ ով էլ լինի իրենց կողքին, բարեկամության կոչ են անելու, բայց պարտադրելով բարեկամություն չի լինում։ Եթե մարդիկ եկել են իշխանության՝ ինչ-ինչ թելադրանքներ կատարելու, այս թեզը տանելու են այնքան, քանի դեռ «թառած են» իշխանության գլխին։ Ցավն այն է, որ ժողովրդի մեջ այդ շերտը կա, որ դեռ շարունակում է հավատալ նրանց։ Մշակույթի պահպանումը կախված է հիշողությունից, եթե հիշողությունդ պահես, ամեն ինչ իր ժամանակին կհաղթահարվի, իսկ եթե հիշողությունդ կորցնում ես, քեզ ամեն ինչ կհրամցնեն իրենց ուզած ձևով»,-ասաց Սպարտակ Ղարաբաղցյանը։