Ձեզ թվում է՝ եթե հայերեն լեզվով Ալիևին շան տուր եք տալիս, ինչ-որ ազդեցություն ունի՞ աշխարհի վրա, միջազգային դիվանագիտական աշխատանքն ո՞ւր է. Էդմոն Մարուքյանը՝ պատգամավորներին (տեսանյութ)
Երեկ հայկական ամբողջ սոցիալական ցանցերը ողողված էին Ադրբեջանի հանցագործ քաղաքական իշխանության հայտարարություններով՝ Ադրբեջանում բացված պուրակի հետ կապված: Այս մասին այսօր Ազգային ժողովում իր ելույթում ասաց «Լուսավոր Հայաստան» խմբակցության ղեկավար Էդմոն Մարուքյանը:
«Մեզ ի՞նչ է թվում, մեզ թվո՞ւմ է, որ մեր խորհրդարանում դատափետող ելույթներ ենք ունենում, դա մեծ ազդեցությո՞ւն է ունենում Ադրբեջանի վրա, իրենք նայելու, ասելու են՝ մի պուրակ բացեցինք, ամբողջ երկիր խառնվեց է իրար: Իսկ ի՞նչ ենք անում, որ այդ պուրակները չբացվեն»,-ասաց նա:
Էդմոն Մարուքյանը հարցրեց նաև, թե ուր է ԱԳՆ հայտարարությունը: «Ձեզ թվում, է որ հայերեն լեզվով Ալիևին շատ տուր եք տալիս, ինչ-որ ազդեցություն ունի՞: Միջազգային դիվանագիտական աշխատանքը ո՞ւր է, բա պետք է գործ արվի, ամբողջ աշխարհը պետք է տեսնի, թե ինչ այլանդակ ղեկավարության հետ գործ ունի Հարավային Կովկասի տարածաշրջանը»,-ասաց նա:
Պատգամավորը հիշեցրեց, որ 2016 թվական ապրիլյան պատերազմից հետո պատգամավորական խմբով գնացել էին Արցախ և փաստահավաք առաքելություն իրականացրել, դրանից հետո լոբբինգ են արել, որ ԱԳՆ-ն աշխատի, այդ փաստերը ներկայացնի: Ըստ նրա՝ քանի որ այդ գործը չարվեց, դա կրկնվեց 2020 թվականին և եթե այսօր էլ չարվեց, էլի է կրկնվելու: «Պետք է գործ արվի և ոչ միայն հայերեն՝ Ազգային ժողովի ամբիոնից»,-ասաց նա:
Հիշեցնենք, որ երեկ Բաքվում «Ռազմական ավարի պուրակ» էր բացվել, որտեղ ներկայացվել է ավելի քան 300 ցուցանմուշ, այդ թվում՝ մինչև 150 կտոր ծանր տեխնիկա, հայ զինվորների սաղավարտներ, ծառայողների կերպարներ (մանեկեններ), որոնք բոլորն էլ ներկայացված են արժանապատվությունը ոտնահարող, նվաստացուցիչ վիճակում: