Չինաստանի հիվանդությունների վերահսկման և կանխարգելման կենտրոնի ղեկավարը խոստովանել է, որ հակակորոնավիրուսային պատվաստանյութերի արդյունավետությունն այդքան էլ բարձր չէ
Չինաստանի հիվանդությունների վերահսկման և կանխարգելման կենտրոնի ղեկավարը հայտարարել է, որ ներկայիս հակակորոնավիրուսային պատվաստանյութերը ցածր պաշտպանություն են առաջարկում կորոնավիրուսի դեմ և դրանք իրար հետ խառնելը դրանց արդյունավետությունը խթանող ռազմավարությունների շարքում է:
Չինաստանը բաշխել է հարյուր միլիոնավոր չափաբաժիններով հայրենական արտադրության պատվաստանյութեր արտերկրում և ապավինում է դրանց ՝ սեփական զանգվածային պատվաստանյութերի իրականացման համար: Բայց Հիվանդությունների վերահսկման և կանխարգելման չինական կենտրոնի տնօրեն Գաո Ֆուն շաբաթ օրը կայացած խորհրդաժողովում ասել է, որ պատվաստանյութերի արդյունավետության մակարդակը բարելավման կարիք ունի:
«Մենք կլուծենք այն հարցը, որ ներկայիս պատվաստանյութերը պաշտպանության շատ բարձր մակարդակ չունեն: Այժմ քննարկվում է, թե արդյոք մենք պետք է տարբեր պատվաստանյութեր օգտագործենք տարբեր տեխնիկական գծերից` իմունիզացման գործընթացի համար», - ասել է Գաոն հարավ-արևմտյան Չենգդու քաղաքում կայացած խորհրդաժողովում:
Associated Press-ին տված մեկնաբանությունում Գաոն ընդգծել է, որ իր հայտարարությունը վերաբերում է «առհասարակ աշխարհում պատվաստանյութերի արդյունավետությանը և ոչ թե մասնավորապես չինական արտադրության պատրաստուկներին»: Միևնույն ժամանակ նա չի պատասխանել հետագա հարցերին, թե որ պատվաստանյութերի մասին է խոսքը, բայց շեշտել է, որ ինքը զուտ չինական պատվաստանյութերը նկատի չուներ:
Չինաստանը ներկայում ունի հինգ պատվաստանյութ, որն օգտագործում է զանգվածային իմունիզացիայի արշավի շրջանակում: Պատվաստանյութերի արդյունավետությունը տատանվում է 50-79%-ի սահմանում: