Ունենք շուրջ 800 գերի. այս կառավարության համար պետք է դառնանք գիշերվա սարսափ, որ օր առաջ մեր երեխաներին վերադարձնեն. զոհված զինծառայողի հայր

Կառավարությունը չի կարող պատկերացնել՝ այնտեղ ինչ օրեր են տեսնում մեր երեխեքը, բայց մենք՝ ծնողներս, զգում ենք ու հասկանում, թե ինչ կարող է կատարվել մեր երեխաների հետ: Այս մասին լրագրողների հետ զրույցում ասել է զոհված զինծառայողներից մեկի հայրը:

«Մենք պահանջում ենք, որ Փաշինյանը անձամբ բոլորիս ընդունի, ոչ թե իր օգնականները, մենք պետք է կոնկրետ հասկանանք՝ ինչ է կատարվում և ինչ փոփոխությունների մասին է խոսքը, այսօր մենք 800-ից ավելի գերի երեխա ունենք: Մեր տղաները այնտեղ են, ու կառավարությունը չի պատկերացնում՝ երեխեքը այնտեղ ամեն օր ինչերի միջով են անցնում, այսօր ծնողներն են միայն պատկերացնում ու հասկանում, այդ իսկ պատճառով մենք բոլորս պահանջում ենք , որ մեզ բացատրություն տան՝ ովքեր են այնտեղ, ում երեխեքն են»,- ասել է ակցիա իրականացնող քաղաքացին:

«Այս բոլոր ծնողները վշտի մեջ են, ո՛չ քուն ունեն, ո՛չ դադար, մղձավանջում են ապրում, մենք պետք է գոնե հասկանանք, թե ովքեր են զբաղվում գերիների և անհայտ կորածների հարցերով, գնում ենք ՊՆ, այնտեղից ուղարկում են ԱԱԾ, հետո Կառավարություն և այլն: Թող մեզ ասեն երեխեքի անունները»,- նշել է նա:

Քաղաքացին նշեց՝ կառավարությունը մեկ րոպե պետք է հանգիստ չունենա մինչև անհայտ կորածներին չգտնի, իսկ գերիներին՝ չվերադարձնի:

«Մի վայրկյան շուտ երեխեքին պիտի բերեն, չբերեն, մի օր առաջ երեխեքի պոչկեքը կհանեն ու կծախեն, մարմինն էլ կգցեն ու կասեն՝ եկեք, տարեք, դրա համար չպետք է թողնենք կառավարությունը մեկ վայրկյան քնի, մենք պետք է դառնանք նրանց գիշերվա սարսափը: Այլևս չափ ու սահման չկա»:

Դիմում եմ գործող իշխանությանը՝ մեզ հանցագործ մի դարձրեք, այլապես հաշվեհարդարը ահավոր է լինելու. անհետ կորած զինծառայողի հայր

«Մենք մեր երեխաներին ենք ուզում, ուրիշ ոչ մի բան մեզ պետք չի»․ անհետ կորածների և գերիների ծնողները ակցիա արեցին Կառավարության դիմաց (տեսանյութ)