«Մենք առաջնային ենք համարում մեր քաղաքացիների կյանքը»․ Ուկրաինայի ԶՈՒ ԳՇ պետը զինված ճանապարհով Դոնբասի հակամարտության լուծումն անընդունելի է համարել
Ուկրաինայի զինված ուժերի գլխավոր շտաբի պետ Ռուսլան Խոմչակը հերքել է այն ենթադրությունները, թե Ուկրաինան Դոնբասի զինված հակամարտության գոտում հարձակման է պատրաստվում՝ դրանք անվանելով ապատեղեկատվություն, գրում է interfax.ru-ն։
«Ժամանակավորապես բռնազավթված տարածքների ուժային ճանապարհով ազատումն անխուսափելիորեն կհանգեցնի մեծ թվով խաղաղ բնակիչների մահվանը և զինծառայողների շրջանում կորուստների, ինչն անընդունելի է Ուկրաինայի համար։ Հավատարիմ լինելով համամարդկային արժեքներին և միջազգային մարդասիրական իրավունքի նորմերին՝ մեր պետությունն առաջնային է համարում իր քաղաքացիների կյանքը»,- այսօր հայտարարել է Խոմչակը։
Նա նշել է, որ «Ուկրաինայի բարձրագույն ռազմաքաղաքական ղեկավարությունը Դոնեցկի և Լուգանսկի մարզերում զինված հակամարտության կարգավորման քաղաքական-դիվանագիտական սցենարը սահանել է որպես առաջնահերթություն»։
Ընդ որում, նա հավաստիացրել է՝ Ուկրաինայի Զինված ուժերը պատրաստ են համարժեք արձագանքել ինչպես հակամարտության սրման, այնպես էլ Ուկրաինայի շուրջ ռազմաքաղաքական իրադրության բարդացման դեպքում:
Խոմչակը նաև հայտարարել է, որ երկրի Զինված ուժերն ակտիվացրել են ՆԱՏՕ-ի հետ ռազմական երկխոսությունը և խորացրել են Սևծովյան տարածաշրջանում համագործակցությունը:
Նա վստահեցրել է` Ուկրաինա-ՆԱՏՕ համագործակցությունը «կրում է բացառապես խաղաղ բնույթ, ուղղված է երկրի պաշտպանունակության ամրապնդմանը»: