Ավստրալիայում, ի հիշատակ արքայազն Ֆիլիպի, կրակահերթ է արձակվել, իջեցվել են պետական դրոշները
Ավստրալիայի խորհրդարանի շենքի մոտ երկրի Դաշնային գվարդիան կրակահերթ է արձակել՝ ի հիշատակ Մեծ Բրիտանիայի արքայազն, Էդինբուրգի դուքս Ֆիլիպի, հայտնում է «ՌԻԱ Նովոստի» լրատվական գործակալությունը՝ հղում տալով տեղական ABC հեռուստաընկերությանը։
Կրակահերթն արձակվել է խորհրդարանի շենքի դիմաց` արարողակարգային 6 հաուբիցներից՝ 10 վարկյան անընդմեջ։ Ի հարգանք հանգուցյալ արքայազնի իջեցվել են պետական դրոշներն ամբողջ երկրում։ Երկրի վարչապետի և կառավարության կայքում բացվել է ցավակցությունների գիրք: Վարչապետ Սքոթ Մորիսոնն ուրբաթ ցավակցություն է հայտնել բրիտանական արքայազն Ֆիլիպի մահվան կապակցությամբ:
Հիշեցնենք՝ արքայազնի մահվան մասին թագավորական ընտանիքը հայտնել է իր թվիթերյան էջում․ «Խոր ցավով Նորին Մեծություն թագուհին տեղեկացրել է իր սիրելի ամուսնու՝ Էդինբուրգի դուքսի մահվան մասին: Նորին թագավորական մեծությունը կյանքից խաղաղ հեռացել է այսօր առավոտյան` Ուինձորի ամրոցում»։
Արքայազնը մահացել է 99 տարեկանում։ Նա Մեծ Բրիտանիայի պատմության մեջ միապետի ամենաերկարակյաց կողակիցն է:
Զույգն ամուսնացել է 1947 թվականին, երբ թագուհին ընդհամենը 21 տարեկան էր, իսկ արքայազնը թագավորական նավատորմի սպա էր, որը սերում էր հունական և դանիական թագավորական ընտանիքներից։ Այսպիսով, Ֆիլիպ Մաունթբաթենը դարձել է Էդինբուրդի դուքս արքայազն Ֆիլիպ։
Փետրվարին արքայազնը տեղափոխվել էր Լոնդոնի կենտրոնում գտնվող «Էդուարդ VII» մասնավոր հիվանդանոց, ապա սրտի վիրահատություն էր տարել Սուրբ Բարդուղիմեոսի հիվանդանոցում։