Մեզ այս կառավարությունը պետք չէ, միայն թշնամին կարող է խոսել Ադրբեջանի և Թուրքիայի հետ բարեկամության մասին, կարելի՞ է այսքան չսիրել պետությունը. Փարավոն Միրզոյան (տեսանյութ)
Մեր պետության մթնոլորտն առողջ չէ, մենք չկարողացանք պահել հաղթած բանակն ու պետությունը, և եթե այսօր մեզ արհամարհաբար են վերաբերվում, մեղավորը մենք ենք. վարչապետը չկարողացավ ղեկավարել երկիրը, այն ներկայացնել, էլ ինչո՞ւ էր հանդիպում Պուտինի հետ, եթե չի կարողացել գերիների վերադարձի հարցը ձևակերպել: «Արմնյուզ» ՀԸ «#ՕրաԽնդիր» հաղորդման ժամանակ նման կարծիք է հայտնել ՀՀ ժողովրդական նկարիչ, Հայաստանի ազգային պատկերասրահի նախկին տնօրեն Փարավոն Միրզոյանը:
«Մեզ արդեն խղճում են, դա շատ վիրավորական է, դա մեր ղեկավարության մեղքն է: Մեր իշխանությունը խեղճ է, անկիրթ, նրանց քայլերն ու խոսքերն ուղղակի զարմանալի են: Մեղրիի միջանցքի հարցը չպետք է քննարկվի, եթե այն բացվի, մենք կկորցնենք մեր պետականությունը: Նման ծրագիրն անթույլատրելի է, մեր պետությունը կկործանվի: Արդեն երկրորդ անգամ վարչապետը Պուտինի հետ հանդիպում է, արդյունքում ոչինչ չկա, չեն գնահատում ո՛չ նրան, ո՛չ էլ մեզ»,- ասել է արվեստագետը:
Ըստ Միրզոյանի՝ Փաշինյանն իրավունք չպետք է ունենա նույնիսկ Հայաստան մտնելու, եթե նման փաստաթղթի տակ ստորագրություն է դրել, իրավունք չպիտի ունենա պաշտոնավարելու. «Ընդդիմությունը լավ չաշխատեց, ճառ են ասում, զանգ կախող չկա, ծրագիր չկա: Ինչքա՜ն ցուցահանդեսներ ենք արել Շուշիում, այնտեղ կանգնում ես, Տիեզերքը երևում է, մենք չենք հասկանում՝ ինչ ենք կորցրել: Այս իշխանությունը մշակույթի նախարարությունը փակեց, քանի որ նույնիսկ նախարարի թեկնածու չուներ: Երեք տարում ինչ արել են, դեմ է մեր ազգային ծրագրերին: Պետք է ժամանակին ընդունեին իրենց սխալները»:
Գեղանկարչի կարծիքով՝ ցավալի է, որ ադրբեջանցիները մեր հանդեպ թշնամաբար խոսում են, իսկ մենք չենք պատասխանում. «Չի կարող հայը թուրքի հետ բարեկամություն անել, նրանք ուզում են մեզ վերացնել: Թուրքը չի փոխում իր կաշին: Չի կարելի սահմանները բացել, եթե թուրքը մտավ մեր հող, աստիճանաբար մեր տները վերցնելու է, պատմությունը ցույց է տվել դա: Մեր հույսը պիտի մեզ վրա դնենք, թուրքերի հետ բարեկամություն չի կարելի անել: Ղեկավարը պետք է խելոք և ազգասեր լիներ, որ հրաժարական տար, մենք մեղավոր ենք, որ հանդուրժում ենք նրան, չենք կարողանում նույնիսկ ռուսների հետ պայմանավորվել: Կարելի՞ է այսքան չսիրել հայ ժողովրդին և պետությունը»:
Փարավոն Միրզոյանի պնդմամբ՝ երեք տարում բոլոր բարեկամների, նախևառաջ Ռուսաստանի հետ հարաբերությունները փչացրինք: «Պարտվել ենք ոչ թե մենք, այլ իշխանությունը: Այս կառավարությունը պետք է ներողություն խնդրի և հեռանա, մենք էլ փնտրենք մի ճանապարհ, որ նորից ազգ ու պետություն դառնանք: Մեր երկիրը մատնված է ինքնահոսի, չի ղեկավարվում: Չկա մի ոլորտ, որից կարելի է գոհ լինել: Մեր պատմության այս էջը պետք է պատռել դասագրքերից, ամոթ է, որ մեր սերունդները կարդան սա: Առաջիկա ընտրությունները ցույց կտան՝ մենք դրական քայլ կանե՞նք, թե՞ էլի ճահճի մեջ ենք լինելու: Չի կարող հայ մարդը, այն էլ իշխանավորը, խոսել Ադրբեջանի և Թուրքիայի հետ բարեկամության մասին, նրանք թշնամի են: Մեզ այս կառավարությունը պետք չէ, նրանք իրավունք չպետք է ունենան ղեկավարելու մեր երկիրը»,- ամփոփել է Փարավոն Միրզոյանը: