Մուրադովը զարմացած էր, թե ինչու է Կառավարության աշխատակազմից դուրս եկել այդ ինֆորմացիան և արդեն գերիների ծնողներին փոխանցվել, թե բերում են գերիներին․ Սոֆյա Հովսեփյան

Պաշտպանության նախարարությունն առաջարկել էր 10-10 հոգով հանդիպել, սակայն անհետ կորածների և գերիների ծնողները պահանջեցին բոլորով հանդիպել։ Այստեղ 50-60 հոգի կա, ուզում են միասին մտնել ու իրենց պահանջները ներկայացնել։ Այս մասին ՊՆ շենքի մոտ լրագրողների հետ զրույցում այսօր կեսօրին ասել է ԱԺ պատգամավոր Սոֆյա Հովսեփյանը։

Հարցին՝ ի՞նչ կաշկանդվածություն ունի նախարարը, որ չի համաձայնում դուրս գալ ու անհետ կորածների և գերիների հարազատների հետ դրսում խոսել, արդյո՞ք վախենում է, պատգամավորն արձագանքեց, թե ինքը չի կարող ասել՝ ինչն է պատճառը։ «Ես, առավոտից այստեղ լինելով, որևէ կաշկանդվածություն չեմ զգացել, և վստահ եմ՝ նախարարն էլ չպետք է ունենա, պարզապես, հավանաբար, իրենց մոտեցումն այդպես է, որ պետք է փոքր խմբերով քննարկումներ անեն»,-ասաց նա։

Անդրադառնալով Արցախում ռուսական խաղաղապահ բրիգադի հրամանատար Ռուստամ Մուրադովի՝ գերիների վերադարձին վերաբերող այն հայտարարությանը, թե ՀՀ պաշտոնյաները մոլորեցնում են բնակչությանը, Սոֆյա Հովսեփյանն ասաց․

«Երեկ ես արդեն տեղյակ էի, խոսել էի հենց իրենց հետ, և իրենք զարմացել էին, որ նման ինֆորմացիա է տարածվում, որ գերիներ պետք է բերվեն։ Մասնավորապես, որ գերիներին պետք է տեղափոխեր Մուրադովը, որը տեղյակ չէր այդ մասին, միևնույն ժամանակ զարմացած էր, թե ինչու է Կառավարության աշխատակազմից դուրս եկել այդ ինֆորմացիան, և արդեն գերիների ծնողներին փոխանցվել պատգամավորի միջոցով։ Թե ինչ միտում կար, չեմ կարող ասել»,-ասաց նա։

Ինչ վերաբերում է Շիրակում տիրող իրավիճակին, որտեղ գերիների հարազատները փակել են ճանապարհները, պատգամավորն ասաց, թե այս պահին ամբողջ Շիրակի մարզը պարալիզացված է։

«Գերիների հարազատները պահանջում էին վարչապետի հետ հանդիպում, երեկվանից ունեին պայմանավորվածություն՝ այսօր ժամը 4-ին վարչապետի հետ հանդիպման վերաբերյալ, բայց, կարծես թե, չեն գալիս հանդիպման ու պահանջում են՝ վարչապետն անձամբ գնա նրանց հետ հանդիպման, իսկ հիմա ԱԱԾ տնօրենի հատ հանդիպում կկայանա, կփորձեն հասկանալ՝ ինչ էր առհասարակ երեկ կատարվել»,-նշեց պատգամավորը։

Նրա դիտարկմամբ՝ գերիների ծնողները բավականին գիտակցված են մոտենում նրանց վերադարձի հարցին, և եթե երեկ այդ խաբկանքը, կեղծիքը չլիներ, թե գերիները վերադառնում են, այսօր, ըստ Հովսեփյանի, դժվար թե փողոցներ փակվեին։

Դիտարկմանը, թե իշխանությունը մեկ ընդդիմությանն է մեղադրում, որ վերջինիս բողոքի ակցիաների պատճառով չի ստացվում վերադարձնել գերիներին, մեկ այլ դեպքում էլ հենց գերիների հարազատներին է մեղադրում, Հովսեփյանն արձագանքեց․ «Ամեն ինչին խանգարում է անգործությունը, եթե կազմակերպված աշխատեն, որևէ մեկը խանգարել չի կարող»,- ասաց նա։

Հիշեցնենք, որ անհետ կորածների ու գերիների հարազատները երեկվանից շրջափակել են ՊՆ մուտքերը՝ հանդիպում պահանջելով ՀՀ պաշտպանության նախարար Վաղարշակ Հարությունյանի և ԳՇ պետ Արտակ Դավթյանի հետ, սակայն , թեև նրանցից մի քանիսը հանդիպել են Արտակ Դավթյանի հետ, գոհ չեն մնացել հանդիպումից:

Լարված իրավիճակ ՊՆ–ի մոտ․ անհետ կորածների և գերիների հարազատները շարունակում են մնալ ՊՆ շենքի մոտ (Տեսանյութ և լուսանկարներ). Tert.am

ՊՆ-ն պաշտոնյաներին ուղղաթիռով են դուրս բերել ՊՆ շենքից (տեսանյութ)

Ձեր պաշտոնյաները մոլորեցնում են բնակչությանը․ Ռուստամ Մուրադովը՝ գերիների մասին․ hraparak.am

Ադրբեջանից վերադարձած ինքնաթիռը դատարկ չի եկել, Մուրադովի հետ Հայաստան է եկել Թուրք-Ադրբեջանական մի պատվիրակություն, որի առաքելությունը Մեղրիի տարածքում կառուցվող ճանապարհի տեղորոշումն է