Երկար վերլուծելու խնդիր է, թե ինչու գերիները չվերադարձվեցին. ուզում եք ինձ համոզել, որ որևէ մեկը չգիտե՞ր, որ պայմանավորվածություն է խախտվելու. Նաիրա Զոհրաբյան

Ուզում եք ինձ համոզել, որ որևէ մեկը չգիտեր՝ պայմանավորվածությո՞ւն է խախտվելու: Սա դեռ երկար վերլուծելու խնդիր է, թե ինչու գերիները չվերադարձվեցին: Ես կարծում եմ, որ եթե պետությանդ հարգում են, կարող էին ասել՝ մի՛ թռեք, խնդիրներ են առաջացել, բայց ինքնաթիռը գնում է Բաքու և վերադառնում առանց գերիների: Այս մասին այսօր ԱԺ-ում լրագրողների հետ զրույցում ասաց «Բարգավաճ Հայաստան» կուսակցության պատգամավոր Նաիրա Զոհրաբյանը:

Նա նկատեց, որ կան խոսակցություններ, թե սա արվեց, որպեսզի շեղեն ուշադրությունը Մեղրիում հավանական չափագրումներ իրականացնելուց, նա նշեց, որ չի կարող մեկնաբանել սա, բայց հորդորեց Մեղրի համայնքի ղեկավարին, որ զգոն լինի:

«Չգիտեմ, թե Ալիևն էլ ինչ պետք է անի, ինչպես պետք է նվաստացնի մեր պետությանը, որ հասարակությունը սթափվի ու հասկանա, որ պատերազմը պարտության տարած ղեկավարը չի կարող հաղթահարել պատերազմի հետևանքները. ռազմագերիների խնդիր, տեղահանված արցախցիների խնդիր, Արցախի հետագա կարգավիճակի բանակցությունների խնդիր: Դու չես կարող վարել արժանապատիվ բանակցություններ, որովհետև քեզ հետ վարվելու են այնպես, ինչպես երեկ»,-ասաց Զոհրաբյանը:

Պատգամավորի խոսքով՝ այս իրավիճակում անհասկանալի է իշխանական այն պատգամավորների պահվածքը, որոնք դեռ շարունակում են խոսել խաղաղության մասին, խաղաղասիրական կոչեր են հնչեցնում: «Ադրբեջանն այնքան ցինիկ է, որ երբ մեզ մոտ տարբեր իշխանական պատգամավորներ իրենց էջերում գրեցին, որ հիմա Բաքվից մեր ռազմագերիներին բերող ինքնաթիռը կժամանի, հենց նույն Ադրբեջանի ԱԳ նախարար Ջեյհուն Բայրամովը հայտարարեց, որ ռազմագերիների հարցը փակված է, և որ բոլոր գերիները վերադարձվել են, իսկ նրանք, որոնք հիմա պահվում են Ադրբեջանում, ռազմագերիներ չեն, այլ ահաբեկիչեր են: Ուզում է ասել՝ մենք թքել ենք ձեր էմոցիաների, ձեր ազգային շահի, ձեր խնդիրների վրա»:

Իսկ հարցին, թե ինչպես ստացվեց, որ ինքնաթիռը դատարկ վերադարձավ, Զոհրաբյանը պատասխանեց, որ այդ հարցին պետք է պատասխանեն Նիկոլ Փաշինյանն ու նրա մամուլի խոսնակը, որն անջատել է հեռախոսն ու որևէ մեկին չի հաջողվում նրա հետ կապ հաստատել: Ըստ նրա՝ լղոզված էր նաև Տիգրան Ավինյանի պատասխանը, սակայն վերջինս հստակ պետք է պատասխանի այն հարցին, թե արդյո՞ք գիտեր, որ ինքնաթիռը դարակ էր վերադառնալու Բաքվից: «Եթե չգիտեիք, ապա ինչու եք Դուք Ձեր պաշտոնում, Դուք եք զբաղվում գերիների հարցով, եթե չգիտեիք, ապա հենց հիմա պետք է հրաժարական գրեք ու հեռանաք»: