Ոստիկանները, որոնք այսօր կանանց քաշքշելով բերման են ենթարկել, պետք է գնան իրենց կանանց և մայրերին շնորհավորե՞ն. Նարեկ Սամսոնյանը՝ «ՎԵՏՕ» շարժման կանանց բերման ենթարկելու մասին

Այսօր շարժման կանայք նոր իմաստ են տվել տոնին, ես ուրախ եմ, որ մեր կողքին ապրում են այսպիսի մարդիկ: Այս մասին Ոստիկանության Կենտրոնական բաժնի մոտ ասել է «Քաղաքացիական գիտակցություն» ՀԿ-ի նախագահ Նարեկ Սամսոնյանը՝ անդրադառնալով «ՎԵՏՕ» շարժման կանանց բերման ենթարկելուն:

«Ես ուրախ եմ, որ մեր երկրում գտնվեցին կանայք, որոնք այս տոնը վերաիմաստավորեցին, քանի որ այս տոնը կանանց պայքարի տոնն է, այս տոնն այն տոնն է, որտեղ այսպիսի կանայք պետք է ցույց տան, որ այո, նրանք երբեք չեն համաձայնվելու Նիկոլ Փաշինյանի որդեգրած քաղաքականության հետ»,- ասաց Նարեկ Սամսոնյանը:

Նա նաև տեղեկացրեց՝ բերման են ենթարկել 44-օրյա պատերազմի ընթացքում զոհված կապիտան Իշխան Պետրոսյանի դստերը:

«Պատկերացնում եք՝ այն ոստիկանները, որոնք այսօր կանանց քաշքշելով տանում էին տեղամասեր, պետք է գնան տուն, իրենց կանանց ու աղջիկներին շնորհավորեն ապրիլի 7-ի կապակցությամբ»,- նշեց նա:

Հիշեցնենք՝ «ՎԵՏՕ» հասարակական-քաղաքական շարժման անդամներն այսօր քայլերթ էին սկսել Շառլ Ազնավուրի հրապարակից դեպի Կառավարության շենք, ակցիայի մասնակից կանայք իրենց հետ բերել էին ձվեր և կարմիր մեխակներ, որոնք նետեցին Կառավարության շենքին: Ոստիկանության աշխատակիցների և ակցիա իրականացնողների միջև հրմշտոց սկսվեց, և ոստիկանները բերման ենթարկեցին շարժման կանանց:

Նշենք նաև, որ «ՎԵՏՕ» շարժման ակցիայի ընթացքում այսօր բերման է ենթարկվել նաև ՀՀ ազգային հերոս Տիրան Խաչատրյանի կինը:

Ոստիկանները բերման են ենթարկել «Ազգային օրակարգ» կուսակցության խորհրդի անդամ Վարազդատ Հարությունյանին, սակայն մոտ 40 րոպե անց ազատ են արձակել նրան:

Նիկոլ Փաշինյանն Էրդողանի և Ալիևի դրածոն է ՀՀ-ում․ Կառավարության նիստերը պետք է անցկացնեն թուրքական ֆեսերով․ Ոստիկաններին կոչ կանեմ նախ տղամարդ լինել, հետո՝ ոստիկան Նարեկ Մալյան

Կառավարության շենքի մոտ ակցիա իրականացնող 15 անձ է բերման ենթարկվել. «ՎԵՏՕ» շարժման 3 անդամ ազատ արձակվեցին ոստիկանության Մաշտոցի բաժնից: