ԿԲ-ի կանխատեսումներով մինչև տարեվերջ գնաճը կվերադառնա իր նորմալ թիրախային մակարդակին. Բաբկեն Թունյան
Եթե էկոնոմիկայի նախարարը հայտարարում է, որ էկոնոմիկան վերականգնվում է, դա չի նշանակում, որ ամբողջությամբ վերականգնվել է. երբ կունենաք նախաճգնաժամային ժամանակի ցուցանիշները, այդ ժամանակ կարող ենք ասել, որ տնտեսությունը վերականգնվել է: Այս մասին, այսօր՝ ապրիլի 6-ին, ԱԺ-ում լրագրողների հետ զրույցում նշեց ԱԺ տնտեսական հարցերի հանձնաժողովի նախագահ Բաբկեն Թունյանը:
«Բայց որ անկման տեմպը գնալով դանդաղում է, ինչը առաջիկա ամիսներին ավելի տեսանելի կլինի, դա միանշանակ է: Ինչ վերաբերում է նրան, որ ձեւակերպումներում մեկը կարող է ավել լավատեսական լինել, մյուսն ավելի զգուշավոր, դա նորմալ է»,-ասաց նա:
Ինչ վերաբերում է Էկոնոմիկայի նախարար Վահան Քերոբյանի հայտարարությանը, եր երկնիշ աճի նպատակ ունի, Թունյանը նկատեց, որ դա ընդամենը նպատակ է եւ լավ է, որ նախարարն իր առջեւ նման նպատակ է դնում:
Անդրադառնալով գնաճին, որը վերջին տվյալներով անցել է 6 տոկոսից, հանձնաժողովի նախագահն ասաց, որ ԿԲ-ի կանխատեսումներով մինչեւ տարեվերջ գնաճը կվերադառնա իր նորմալ թիրախային մակարդակին, այսինքն կլինի 3-5 տոկոսի շրջանակներում. «Կառավարությունն այս պայմաններում ի՞նչ պետք է անի. մի կողմից պետք է հնարավորության սահմաններում խոցելի խմբերին աջակցի, երկրորդը, փորձի այնպես անել, որ տնտեսական աճը արագ վերականգնվի, որովհետեւ պետությունը ապրանքների գների վրա ուղիղ ազդեցություն չունի: Եթե, օրինակ, ներմուծվող որեւէ ապրանք միջազգային շուկայում թանկանում է, որեւէ մեկը վաճառողին չի կարող ստիպել, որ նա ինքնարժեքից ցածր վաճառի կամ վնասով աշխատի: Պետությունը պետք է քայլեր ձեռնարկի, որ տնտեսությունը հնարավորինս արագ վերականգնվի, ինչը կբերի մարդկանց եկամուտների աճին: Այսինքն եկամուտները գներից վելի արագ պետք է աճեն: Իսկ եթե վերցնենք ուղղակի այս պահին պարտք վերցնելով թոշակ կամ աշխատավարձ բարձրացնենք, դրնով խնդիրը չի լուծվի, որովհետեւ դա իր հերթին ավելի մեծ գնաճի է բերելու»,-ասաց նա: