Չեմ ուզում ոչ ոքի մեղադրել, բայց պարզ է, որ անփութություն կա, հոսանքի լարերը լավը չեն. փոխհատուցման հույսեր չկան. «Սուրմալու» առևտրի կենտրոնի տաղավարի սեփականատեր (տեսանյութ)

Չեմ ուզում ոչ ոքի մեղադրել, բայց պարզ է, որ անփութություն կա, հոսանքի լարերը լավը չեն, տանիքները փայտից են, հակահրդեհային կանոնները պահպանված չեն եղել: Ուրիշի խանութը վառվել է, կրակը մեզ մոտ է հասել: Այս մասին այսօր լրագրողների հետ զրույցում ասաց «Սուրմալու» առևտրի կենտրոնում տաղավարի սեփականատեր Գագիկ Սիմոնյանը՝ խոսելով գիշերը բռնկված հրդեհի մասին:

Նա նշեց, որ տնօրինությունից ոչ ոք իրենց հետ չի խոսել կատարվածի մասին: «Տնօրինությունից ոչ ոք մեզ հետ չի կապվել: Մենք փորձել ենք կապ հաստատել նրանց հետ, ասել են՝ շոկի մեջ ենք, թողեք մենք էլ խելքի գանք, հանգստանանք, հետո ձեզ հետ կխոսենք: Նրանց այստեղ չեմ տեսել դեռ, երևի, իրենց կաբինետներում են»:

Տաղավարի տերը նշեց, որ ըստ իրենց տեղեկությունների՝ հրդեհի մասին ուշ են ահազանգել ԱԻՆ, սակայն, ոչինչ փրկել հնարավոր չի եղել:

«Այս շենքում ամենամեծ խնդիրը էլեկտրականությունն է, այնտեղ հոսանքի շիթ կա, հոսանքի շիթից էլ բոցը տարածվել է: Ամեն մեկը մի տարբերակ է ասում, բայց քրեական գործի արդյունքում ամեն ինչ պարզ կլինի: Այդ հոսանքի պատճառով բազմաթիվ խնդիրներ ենք ունեցել, պարբերաբար հրդեհներ են եղել, լարեր են փոխել: Փոխհատուցման մասին դեռ չենք խոսել, հույսեր չկան, բայց պետք է փորձենք խոսել»,-ասաց նա և հավելեց, որ ըստ տեղեկությունների, հրդեհից մոտ 40 տաղավար վնասվել է:

Մանրամասները՝ տեսանյութում։

Ավելի վաղ հայտնել էինք, որ այսօր՝ ապրիլի 6-ին, ժամը 03:07-ին «ՍՕՍ ՍԻՍԹԵՄՍ» հակահրդեհային ազդարարման համակարգով ահազանգ է ստացվել Ճգնաժամային կառավարման ազգային կենտրոն՝ Երևանի Արշակունյաց պողոտայի թիվ 15 հասցեում գտնվող «Սուրմալու» Երևանի պահածոների գործարանից։ Պարզվել է, որ հրդեհը բռնկվել է «Սուրմալու» առևտրի կենտրոնի կենտրոնական մասնաշենքում (մոտ 2000 քմ)։

Հրդեհի բարդության Թիվ 2 կանչով դեպքի վայր են մեկնել 6 մարտական հաշվարկ, ավտոսանդուղք։ Ավելի ուշ դեպքի վայր է մեկնել եւս 8 մարտկան հաշվարկ: Հրդեհը մեկուսացվել է ժամը 06:24-ին։ Այրվել են խաղալիքների և տնտեսական ապրանքների տաղավարներ՝ գույքով: Դեպքի վայրում է եղել գտնվել ԱԻ նախարար Անդրանիկ Փիլոյանը:

«Սուրմալուում» մարտին անցկացված անվտանգության տարեկան ստուգումների ժամանակ հայտնաբերվել են խախտումներ, նշանակվել է փորձաքննություն. Երևանի հրդեհային և տեխնիկական անվտանգության տեսչության մասնագետ

Հրդեհի վայրում եղել են 18 տաղավար եւ 4 պահեստային մաս. Բոլորին անվճար նոր տարածքներ ենք տվել. «Սուրմալուի» պատասխանատու. մանրամասներ (Լուսանկարներ և տեսանյութեր)