Փորձում են ուրանալ ցեղասպանությունը, մեր իրավունքները. ՀՅԴ–ականը՝ վարչապետի եւ ԱԽ քարտուղարի հայտարարությունների մասին

Որեւէ մեկը Փաշինյանին, կամ իր խմբակի մեկ այլ անդամին, իրավունք չի տալիս մեր ժողովրդի պատմական իրավունքները զիջել եւ մեր հիշողությունն ու ցավը ուրանալ։ Այս մասին NEWS.am-ի հետ զրույցում ասաց ՀՅԴ անդամ Արթուր Խաչատրյանն՝ անդրադառնալով ԱԽ քարտուղարի եւ վարչապետի՝ Թուրքիայի հետ մեր մոտեցումներում որոշակի շտկումներ մտցնելու վերաբերյալ հայտարարություններին։

«Երբ մենք ուժեղ ու միահամուռ էինք, թուրքերն ու ադրբեջանցիները չհանդգնեցին մեր դեմ պատերազմ սկսել։ Նրանք մեր դեմ պատերազմ սկսեցին, երբ ներքինից մենք թուլացանք, պետությունը սխալ ուղով գնաց, պետության ղեկին կանգնեցին մարդիկ, որոնք չունին ազգային իդեալներ, ազգային տեսլական, եւ հիմա մենք ասում ենք, որպեսզի թուրքերի եւ ադրբեջանցիների հետ երկարաժամկետ հարաբերություններ կառուցենք, որտեղ մենք կկարողանանք ուժեղ դիրքերից խոսել, մենք պետք է պատրաստ լինենք պատերազմի։ Որեւէ մեկի մտքով չանցնի, թե զենքով կարող է գալ եւ հայի դեմ կռվել։ Շատ են շահարկում, թե դաշնակցությունը կողմ է պատերազմին, ոչ, դաշնակցությունն ասում է, որ եթե չես ուզում, որ պատերազմ լինի, պետք է պատերազմին պատրաստ լինես»,– ասաց Խաչատրյանը։

Նշենք, որ մարտի 27–ին, Հանրային հեռուստաընկերության եթերում ՀՀ ԱԽ քարտուղար Արմեն Գրիգորյանը պատասխանելով հարցին, թե արդյո՞ք Թուրքիային համարում է թշնամի պետություն, ԱԽ քարտուղարն ասել էր, որ «եթե մենք գնում ենք տարածաշրջանի ապաշրջափակման, ապա մեր մոտեցումներում որոշակի շտկումներ պետք է լինեն եւ իրենք այդ ուղղությամբ աշխատում են»։

Հաջորդ օրը Արմավիրի մարզ կատարած այցի ժամանակ, վարչապետ Նիկոլ Փաշինյանն իր հերթին հայտարարել էր.

«Կարծում եմ՝ մենք տարածաշրջանի նկատմամբ մեր հայացքները պետք է փոխենք։ Մենք պետք է դրա մասին մտածենք։ Այո, ասված է, եւ մենք գիտենք, որ տարածաշրջանում ունենք թշնամիներ, բայց եկեք արձանագրենք՝ ինչքան մենք ենք համարում թշնամի, այնքան էլ մեզ են համարում թշնամի։ Ինչքան մեզ շատ են համարում թշնամի, մենք այդքան ավելի շատ ենք թշնամի համարում»։

«Թշնամությունը ծագեց 1000 տարի առաջ, երբ թուրքերը Ալթայից ներխուժեցին Հայաստան, գրավեցին մեր քաղաքն ու գյուղերը, կոտորեցին մեր ժողովրդին, եւ շարունակեցին կոտորել սրանից մի քանի ամիս առաջ։ Ինչքան էլ, որ մենք ասենք՝ բարեկամություն, դրանից մենք բարեկամ չենք դառնա, իրենք պանթուրքիստական ծրագրեր ունեն։ Եթե մենք ուզում ենք, որ թուրքերի հետ հարաբերությունները կարգավորվեն, պետք է թուրքերը հասկանան, որ ով փորձի մեզ վատություն անել, քառակին կստանա։ Դա է միակ տարբերակը թուրքերի հետ խաղաղ ապրելու համար։ Ով սուրը բարձրացնի, սրով էլ կընկնի։ Մենք ունենք պատմական իրավունքներ, ինչը չի նշանակում, որ մենք վաղը թուրքերի հետ պատերազմ ենք սկսելու, դա նշանակում է, որ աշխարհաքաղաքական իրավիճակները եթե լինեն մեզ համար բարենպաստ, մենք մեր պատմական իրավունքներին տեր կկանգնենք։ Որեւե մեկը Փաշինյանին, կամ իր խմբակի մեկ այլ անդամին, իրավունք չի տալիս, մեր ժողովրդի պատմական իրավունքները զիջել եւ մեր հիշողությունն ու ցավը ուրանալ»,– ասաց Արթուր Խաչատրյանը։

Դաշնակցական գործչի համոզմամբ՝ նման մակարդակով հայտարարությունների նպատակը խամաճիկային պետություն ունենալն է։

«Խամաճիկ դառնալ թուրքերի եւ ադրբեջանցիների ձեռքում։ Փորձում են ուրանալ ցեղասպանությունը, մեր իրավունքները.... Անտրամաբանական է մտածել, որ թուրքի առաջ ծնկի եկած մարդը կարող է վեր կենալ, շալվարը թափ տալ եւ հավասարը հավասարի հետ նստել եւ խոսել։ Պարտվածը պետք է գնա, գան նոր ուժեր, որոնք կարողանան հայ–թուրքական հարաբերությունները բերել որակական նոր հարթության վրա։ Երբեք հարաբերությունների բարելավում մեր շահի հաշվին չպետք է լինի։ Եթե թուրքերն ընդունեն ցեղասպանությունը, վերացնեն դրա հետեւանքները, այո, իհարկե, հարաբերությունների բարելավում պետք է լինի»,– հավելեց նա։