Վերջին անգամ, որ եկավ տղայի վզին օրհնած խաչ գցեց. 23-ամյա կամավոր Արմանը յոթ ամսական որդի ուներ
23-ամյա Արման Օհանջանյանը սեպտեմբերի 30-ին կամավոր մեկնել էր ռազմաճակատ՝ մորն ասելով, որ զինկոմիսարիատն է ուղարկել:
«Ինքը զինկոմիսարիատ էր գնացել, բայց քանի որ հարթաթաթություն ուներ, իրեն չուղարկեցին: Ինքն էլ ամսի 30-ին գազալցակայանում Արցախի բարբառով խոսող մարդու է հանդիպում, իմանում է, որ Ստեփանակերտ է գնում ու նրա հետ գնում է, մեզ էլ ասում է, թե վայենկոմատն է ուղարկել»- NEWS.am-ի հետ զրույցում պատմեց Արման Օհանջանյանի մայրը՝ Ելիզավետա Օհանջանյանը:
Հոկտեմբերի 1-ին Արմանը բեկորային վիրավորում է ստանում և նախքան դա մորը հրաժեշտի նամակ գրում:
«Գրել էր՝ ինձ հետ ինչ էլ լինի, գլուխդ բարձր ես քայլելու. պոստերը ցրիվ են տվել, մեզ վրա են գալիս: Ինձ ամեն ինչի համար կներեք, ողջ մնամ, կզանգեմ»,- հիշեց Արմանի մայրը:
Ամսի 7-ի երեկոյան Արմանը տուն է վերադառնում և ամսի 8-ի առավոտյան նորից գնում:
«Ասում էր՝ մամ թուրքի հետ էլ չենք կռվում, մոջահեդ է: Ինքը 10 մետրից «բլիժնիյ բոյ» է տվել նրանց հետ ու իրենից սղոց է վերցրել ու շատ հեռախոսներ, որոնք տվել է հետախուզությանը»,- ասաց Ելիզավետա Օհանջանյանը:
Վերջին անգամ Արմանը տուն է վերադարձավ հոկտեմբերի 17-ին. «Հոկտեմբերի 19-ին ես մեր տնից Արմանին ճանապարհեցի ռազմաճակատ: Ասաց՝ մամ, հանկարծ չլացես, թե չէ՝ ձեռքերս կդողան, եթե դու լացես, իմ սիրտը կգուշակի, ու իմ ձեռքերը կդողան, իսկ եթե ձեռքերս դողան, համազոր է մահվան»:
Հոկտեմբերի 20-ին Արմանը վիրավորվում է հակառակորդի կրակոցներից և արնաքամ լինելով՝ մահանում:
«Ինքը որ մեզ վիրավոր վիճակում զանգեց առաջին անգամ ասաց՝ պիկապից 20 մետր եմ հեռու, երկրորդ անգամ՝ 5 մետր եմ հեռու: Ես հույս ունեի, որ ինքը կդիմանա: Ինքը դիմացել է, բայց օգնություն չեն հասցրել:
Որոշ ժամանակ անց մեզ այցելեց պիկապի վարորդը ու մանրամասնություններ հայտնեց: Ասաց, որ այդ օրն իրենց հայտնել են, որ մի փոքր այն կողմի վրա վիրավոր հայեր կան, օգնության կարիք ունի: Վարորդը գնացել է, իր ետևից մի տղա էլ գնացել, բայց այդ տղային Արմանը ետ է ուղարկել ու ինքն է գնացել: Որոշ ճանապարհ անցնելուց հետո հայի համազգեստով մարդկանց են տեսել ու չեն էլ հասցրել մի բան ասել, երբ սկսել են կրակել: Այդ ժամանակ վարորդը մտել է ավտոմեքենայի տակ ու մնացել մի քանի ժամ: Այդ ընթացքում կապ է տվել, որ օգնեն իրենց, բայց ասել են՝ մենք չենք կարող ձեզ մոտ գալ, հեռու եք, դուք պետք է գաք: Երբ դուրս է գալիս ավտոմեքենայի տակից Արմանը դեռ ողջ էր: Իրենց հետ մի տղա էլ կար, իրենք փորձել են դուրս բերել, բայց Արմանն ասել է՝ տղերք, դուք գնացեք: Արմանին դուրս են բերել հոկտեմբերի 20-ի լույս 21-ի գիշերը»,- պատմեց Ելիզավետա Օհանջանյանը:
Արմանն ամուսնացած էր, ուներ յոթ ամսական որդի:
«Ամսի 17-ին, որ եկավ, տղայի վզին օրհնած խաչ գցեց, որը մարտի դաշտում իրեն մի քահանա էր տվել...»,- ավելացրեց Արմանի մայրը:
Արման Օհանջանյանը հուղարկավորվել է հոկտեմբերի 23-ին: